काठमाडौँ । त्रिवि क्रिकेट मैदानमा जारी नेपाल प्रिमियर लिग (एनपीएल)मा भोलि पनि दुई खेल हुँदै छन् । पहिलो खेलमा अपराजित यात्रामा रहेको अनिल साह नेतृत्वको जनकपुर बोल्ट्स र दिपेन्द्र सिंह ऐरी नेतृत्वको सुदूरपश्चिम रोयल्स हुने भएको हो ।
एनपीएलमा अहिलेसम्म चार खेल खेलेको जनकपुर अपराजित रहँदै अंक तालिकाको शीर्ष स्थानमा छ । उद्घाटन खेलमा सन्दीप लामिछाने नेतृत्वको विराटनगर किंग्सलाई पराजित गरेको जनकपुर चौथो खेलमा रोहित पौडेल नेतृत्वको लुम्बिनी लायन्सविरुद्ध एक रनको जित निकालेको थियो ।
यता, चार खेलमध्ये तीनमा जित र एकमा हार बेहोरेको सुदूरपश्चिम अंक तालिकामा दोस्रो स्थानमा रहेको छ । भोलिको खेलमा जनकपुर लगातार पाँचौँ जित निकाल्ने लक्ष्यमा हुँदा सुदूरपश्चिम चौथो जित निकाल्ने दाउमा हुनेछ ।
यस्तै, भोलि दोस्रो खेलमा रोहित नेतृत्वको लुम्बिनी र करण केसी नेतृत्वको काठमाडौँ गुर्खाज आमनेसामने हुँदै छन् । लगातार चार खेलमा पराजय भएर पाँचौँ खेल जितेको लुम्बिनीले लगातार दोस्रो जित निकाल्ने लक्ष्यका साथ मैदानमा उत्रिने भएको छ ।
यता, काठमाडौँ पनि आफ्नो प्लेअफ सम्भावना बलियो बनाउने रणनीतिमा हुनेछ ।
