काठमाडौं । ‘मायामा ठ्याक्क ठुक्क’ बोलको नयाँ म्युजिक भिडियो बिहीबार जे एम डी क्रियसनको युट्युब च्यानलबाट सार्वजनिक भएको छ । यो रोमान्टिक तथा नृत्यप्रधान शैलीको म्युजिक भिडियोले दर्शकलाई मनोरञ्जन प्रदान गर्नका लागि रोचक कथासँगै डान्स, रोमान्स र बोल्ड दृश्यलाई प्रस्तुत गरेको छ । साथै, भिडियोमा समावेश गरिएको कमेडीले दर्शकलाई मज्जाले हसाउने विश्वास गरिएको छ ।
गीतको कथा यसअघि नै चर्चित बनेको ‘अठार कट्यौ कि कटेनौ’ म्युजिक भिडियोको कथा निरन्तरता हो । म्युजिक भिडियोमा नबिन पौडेल र बेनिषा पौडेलले स्वर दिएका छन् । गीतमा शब्द, सङ्गीत र र्याप जगत तिरुवाको हो ।
भिडियोको निर्देशन चर्चित निर्देशक गम्भिर विष्टले गरेका छन् । यसमा कलाकारहरू सुमन ज्योती न्यौपाने ल्याङ्री दादा, उमेश बराल विश्व, सुरक्षा इटानी, नेहा गौतम र सुरेन्द्र बसेलले अभिनय गरेका छन् । भडियोको कोरियोग्राफी रोशन विश्वकर्माले गरेका छन् भने सम्पादन, कलर ग्रेडिङ र पोस्टर डिजाइन राकेश दाहालले गरेका छन् ।
प्रोडक्सन म्यानेजर शम्भु श्रेष्ठ र सहायक निर्देशक सुरेन्द्र बसेलको भूमिका रहेको यस म्युजिक भिडियोलाई जे एम डी क्रियसनले निर्माण गरेको हो । नृत्य र कमेडीको उत्कृष्ट संयोजन रहेको यस गीतले दर्शकलाई नाच्न प्रेरित गर्ने अपेक्षा गरिएको छ ।
