काठमाडाैं । सलोन बस्नेतको फिल्म ‘रंगी’को प्रदर्शन मिति तोकिएको छ। सान्भी इन्टरटेनमेन्ट प्रालिको ब्यानरमा बनेको यो फिल्म फागुन २ गते रिलिज हुने भएको हो।
फिल्मको पोस्टर र मोसन पोस्टर सार्वजनिक गर्दै रिलिज मिति घोषणा गरिएको हो।
पोस्टरमा कलाकार सलोन बस्नेत र बाल कलाकार आयुषी ढकाललाई स्थान दिइएको छ। ग्रामीण बजारलाई पृष्ठभूमिमा राखेर तयार पारिएको पोस्टरमा आयुषी र सलोनलाई गम्भीर भावमा देखाइएको छ।
त्यस्तै, मोसन पोस्टरमा सलोन, आयुषी र नम्रता श्रेष्ठलाई देख्न सकिन्छ। ‘मिस वर्ल्ड नेपाल २०२०’ की विजेता नम्रताले यसै फिल्मबाट डेब्यु गर्नेछिन्।
सुरेश न्यौपानेको ‘डेब्यू’ निर्देशन रहेको फिल्ममा सलोन, नम्रता र आयुषीसहित दिलीप रायमाझी, आयुषी ढकाल, उत्तम केसी, सुमिन गुरुङ, र विशाल पहारीको अभिनय छ।
फिल्म ‘रंगी’ सलोनको डेब्यु निर्माण हो। सलोनका अनुसार फिल्मले बाबुछोरीको कथा देखाउनेछ।
‘नेपाली बाबु’बाट बाल कलाकार बनेर अभिनयमा छिरेका सलोनले फिल्म ‘होस्टल’देखि ‘हिरो’का रूपमा अभिनय गरेका हुन्।
निर्देशन न्यौपानेले भने ‘छक्का पन्जा’, ‘ए मेरो हजुर २’, ‘यात्रा’, ‘म यस्तो गीत गाउँछु २’, ‘कृ’लगायतका फिल्ममा मुख्य सहायक निर्देशनका रूपमा काम गरिसकेका छन्।
सक्षम सुवेदी र करिश्मा केसी बस्नेतको निर्माण रहेको फिल्ममा सुमन गजमेरको लेखन छ। सौरभ लामाको छायांकन रहेको फिल्मलाई एप्पल इन्टरटेनमेन्ट, एफडी र रिच इन्टरटेनमेन्टले वितरण गर्दै छ।
