काठमाडौं । नेपाली कांग्रेसका नेता डा. शेखर कोइरालाले पार्टी सभापति शेरबहादुर देउवाको कार्यशैलीको विरोध गरेका छन् । देउवाले पार्टीलाई आफ्नो अनुकूल ढंगले अघि बढाएको भन्दै उनले विरोध गरेका हुन् ।
कांग्रेस संस्थापक नेता कृष्णप्रसाद भट्टराईको १०१औँ जन्मजयन्तीका अवसरमा सोमबार काठमाडौंमा आयोजित ‘किसुनजीको जीवन र व्यक्तित्व’ विषयक विचार गोष्ठीमा बोल्दै कोइरालाले पार्टी सभापतिले आफ्ना कुरालाई गम्भीरतापूर्वक नलिएको बताए । त्यसैकारण समय–समयमा पार्टीभित्र भागबन्डाको कुरा उठ्ने गरेको उनले जिकिर गरे ।
गुटलाई फस्टाइदिने काम पार्टी सभापतिले गरेको आरोप लगाउँदै कोइरालाले विभिन्न कारणले अहिले पार्टीभित्र विचलन देखिएको कुरा सबैले स्वीकार गर्नुपर्ने धारणा राखे । पार्टी सभापतिले अन्य नेताको कुरा नसुन्दा राजनीति गर्नेहरूलाई अप्ठेरो पर्ने उनको भनाइ छ ।
कोइरालाले कृष्णप्रसाद भट्टराई, गणेशमान, बीपीलगायत कांग्रेसका अग्रज नेतालाई बिर्सिए कांग्रेस नै नरहने धारणा राखे । कृष्णप्रसाद भट्टराईको दृढ संकल्प गर्ने बानी आफूले सदैव स्मरण गर्ने उनले बताए ।
नेता भट्टराईको जन्म विसं १९८१ पुस ८ गते भारतको बनारसमा भएको थियो । राणा शासनमा उनको परिवारले नै भारतको बनारसमा निर्वासित जीवन बिताएको थियो । नेपालको १०४ वर्ष लामो निरंकुश राणा शासन समाप्त पार्न नेता भट्टराईको महत्त्वपूर्ण भूमिका थियो ।
