काठमाडौं । नेकपा (एकीकृत समाजवादी)मा नेताहरूको कार्य विभाजनलाई लिएर फेरि असन्तुष्टि सुरु भएको छ । सम्मानित नेता झलनाथ खनालबाटै कार्य विभाजनप्रति असन्तुष्टि व्यक्त भएको हो ।
एक स्थायी समिति सदस्यले बताएअनुसार खनालले आफ्ना सुझावलाई बेवास्ता गर्दै कार्य विभाजन गरिएको भन्दै असन्तुष्टि जनाएका छन् । उनले आफ्नो समूहका नेताहरूलाई बोलाएर असन्तुष्टि जाहेर गरेका हुन् ।
“पार्टी बैठक र कार्य विभाजनप्रति उहाँको असन्तुष्टि छ, आफ्ना सुझाव नसमेटिएको सन्दर्भमा पनि उहाँले असन्तुष्टि जनाउनुभएको छ”, खनालको असन्तुष्टिबारे ती सदस्यले भने ।
स्थायी समिति बैठकका बिच खनाल स्वास्थ्य समस्याका कारण अनुपस्थित थिए । उनले बैठकमा आफू अनुपस्थित भए पनि बेग्लै राजनीतिक प्रतिवेदन पठाएका थिए । करिब ८ पेजको राजनीतिक प्रतिवेदनमा पार्टीको आगामी कार्यदिशा के हुने, पार्टीभित्रको सांगठनिक व्यवस्थापन कसरी गर्नेलगायत विषय समेटिएका थिए ।
यद्यपि, बैठकमा उनको प्रतिवेदनमाथि छलफल भएन । पार्टी अध्यक्ष माधवकुमार नेपाल र पार्टी महासचिव घनश्याम भुसालको प्रतिवेदनमा केन्द्रित बनेको छलफलमा उनको प्रतिवेदनलाई सुझावको रूपमा ग्रहण गर्ने कुरा महासचिव भुसालले राखेका थिए ।
आफ्नो प्रतिवेदनलाई महत्व नदिएको र कार्य विभाजनमा आफूलाई नसोधिएपछि उनले असन्तुष्टि जनाएका हुन् । ती स्थायी समिति सदस्यले बताएअनुसार विशेषगरी उनको असन्तुष्टि आफूलाई बेवास्ता गरिएकोमा छ ।
“नेतृत्वको हिसाबले पार्टीभित्र खनालको महत्व विशेष छ, यस्तोमा उहाँलाई सोध्ने, उहाँको परामर्श लिने विषय आवश्यक थियो, त्यो नहुनुप्रति असन्तुष्टि स्वाभाविक हो”, ती सदस्यले भने, “उहाँका कुरा समेटेर जानुपर्छ ।”
