काठमाडौं । सूत्र न्युज डटकमको सम्पादकमा लक्ष्मणराज सिटौला नियुक्त भएका छन् । सूत्र मिडिया प्रा.लि.को सञ्चालक समितिले पौष १७ गतेदेखि कायम हुने गरी सिटौलालाई सम्पादकमा नियुक्त गरेको हो ।
बानेश्वर हाइटस्थित सूत्र मिडियाको प्रधान कार्यालयमा एक कार्यक्रमका बिच मिडिया प्रा.लि.का अध्यक्ष केशव खड्काले सिटौलालाई स्वागत गरे । उनले सिटौलाको नेतृत्वमा मिडियाले अझै उचाइ लिने विश्वास व्यक्त गरे ।
नेपाल वायुसेवा निगमका पूर्व उपसचिवसमेत रहेका सिटौला झन्डै चार दशकदेखि सञ्चार कर्ममा पनि सक्रिय छन् । विभिन्न दैनिक पत्रिकाहरूमा स्तम्भकारको भूमिकामा काम गरेका सिटौला साहित्य क्षेत्रमा समेत आबद्ध छन् । सिटौलाका विभिन्न २४ वटा साहित्यिक कृति प्रकाशित छन् ।
विशेषगरी कविता, गीति संग्रह, उपन्यास, निबन्ध संग्रह, जीवनीलगायतका विषयमा उनका कृति प्रकाशित छन् । सिटौलाले रचना गरेका एक हजारभन्दा बढी गीतहरू समेत सार्वजनिक भइसकेका छन् ।
नेपाली साहित्यमा स्नातकोत्तर गरेका सिटौलाले कानुनमा समेत स्नातक गरेका छन् ।
यसअघि सूत्र न्युजको सम्पादकको जिम्मेवारीमा सरोज कोइराला थिए । कोइरालाको बिदाइसँगै मिडियाले सिटौलालाई स्वागत गरेको हो ।
