काठमाडौं । पूर्वराष्ट्रपति विद्यादेवी भण्डारीको नेकपा एमालेमा पुनरागमनको चर्चा चलिरहँदा नेपाली कांग्रेसका महामन्त्री विश्वप्रकाश शर्माले राजनीतिमा नफर्कन सुझाव दिएका छन् । राजनीतिमा भन्दा सामाजिक रुपान्तरणको नायक बन्न भण्डारीलाई उनको सुझाव छ ।
शुक्रबार राजधानीमा भएको नेकपा एमालेका वरिष्ठ उपाध्यक्ष ईश्वर पोखरेलकृत संस्मरण संग्रह ‘आमा, सपना र ताराहरु’ लोकार्पण कार्यक्रममा उनले यस्तो सुझाव दिएका हुन् ।
राजनीतिमा आएर कुनै एक दलको नेता मात्र बन्ने अवसर पनि रहेको र सामाजिक रुपान्तरणको नायक बनेर सबैको नेता बन्ने सुविधा पनि पूर्वराष्ट्रपतिहरूमा रहेको उनको भनाइ थियो ।
एमाले पूर्व उपाध्यक्ष भण्डारी एमाले राजनीतिमा फर्कन सक्रिए रहने चर्चाकैबिच बिहिबार एमाले अध्यक्षसमेत रहेका प्रधानमन्त्री केपी शर्मा ओली उनको बुढानीलकण्ठस्थित निवासमै पुगेर २ घण्टा लामो भेटवार्ता गरेका थिए ।
