काठमाडौं । साताको तेस्रो कारोबार दिन (मंगलबार)को प्रिओपन सेसनमा सेयर बजार परिसूचक (नेप्से) दोहोरो अंकले बढेको छ । प्रिसेसनमा १३.६५ अंकले बढ्दै नेप्से २६५४.३४ को बिन्दुमा उक्लिएको छ ।
दोहोरो अंकले परिसूचक बढ्दै गर्दा नेप्सेमा कारोबार रकम पनि बृद्धि भयो । १६ हजार २६ कित्ता सेयर किनबेच हुँदा कारोबार रकम १ करोड १३ लाख ५५ हजार रुपैयाँको भयो । जुन केही प्रिओपन सेसनकै उच्च कारोबार हो ।
यो सेसनमा विशेषगरी बैंक, जलविद्युत र लघुवित्त क्षेत्रको कारोबार उच्च रह्यो ।
कारोबारमा आएका ८४ कम्पनीमध्ये ४१ को मूल्य बढ्यो भने २६ को मूल्य घट्यो । १७ कम्पनीको भने मूल्य स्थिर रह्यो ।
नेप्से केही कारोबार दिनदेखि नै उकालोमा छ । झिनो अंकले उकालोमा देखिएको नेप्सेमा सोमबार उच्च अंक (४९.१२ अंक)को बृद्धि भएको थियो । जसले मंगलबार प्रिसेसनलाई उत्साहित बनाएको देखिन्छ ।
प्रिसेसनमा परिसूचकमा भएको बृद्धि र कारोबार रकमलाई हेर्दा मंगलबार पनि नेप्सेमा उत्साहपूर्ण बृद्धि हुने देखिन्छ ।
