काठमाडाैं । नेपालमा डिजिटल शिक्षालाई प्रोत्साहन र प्रतिभा विकासलाई बढावा दिने उद्देश्यले, नेपालस्थित चिनियाँ दूतावासले गण्डकी प्रदेशमा पहिलो पटक स्मार्ट कक्षाको सुरुवात गरेको छ। यस परियोजनामा प्रमुख साझेदारको रूपमा हुवावेले अत्याधुनिक शैक्षिक प्रविधिहरू उपलब्ध गराएको छ। माघ ६ गते लमजुङको क्ह्लोसोथार गाउँपालिकास्थित श्री बुद्धोदय माध्यमिक विद्यालयमा उक्त स्मार्ट कक्षा आधिकारिक रूपमा उद्घाटन गरिएको हो।
स्मार्ट कक्षामा हुवावे आइडिया हब (इंटरएक्टिव व्हाइटबोर्ड), ल्यापटप, डेस्कटप, वाइ(फाइ पूर्वाधार, र अनलाइन सिकाइ प्लेटफर्महरू समावेश छन्। यस पहलले दुर्गम क्षेत्रका विद्यार्थीहरूलाई उच्च गुणस्तरीय शैक्षिक सामग्रीमा पहुँच सुनिश्चित गर्दै, उनीहरूलाई विश्वव्यापी स्तरमा प्रतिस्पर्धा गर्न सक्षम बनाउने उद्देश्य राख्छ।
उद्घाटन समारोहमा सञ्चार तथा सूचना प्रविधिमन्त्री पृथ्वी सुब्बा गुरुङ, चीनका राजदूत चेन सोङ र हुवावे नेपालका प्रमुख प्राविधिक अधिकारी ली सियाओवेई लगायतका प्रतिष्ठित व्यक्तिहरू उपस्थित थिए। मन्त्री गुरुङले ग्रामीण नेपालमा शैक्षिक चुनौतीहरूलाई सम्बोधन गर्न यस परियोजनाको महत्त्वलाई औंल्याए। उनले भने, “यो पहलले ग्रामीण नेपालमा डिजिटल खाडललाई कम गर्ने र शैक्षिक अवसरहरू बढाउने दिशामा महत्त्वपूर्ण कदम हो।”
चीनका राजदूत चेन सोङले यस परियोजनालाई चीन-नेपाल सहयोग र डिजिटल शिक्षा वृद्धिको प्रतिबद्धता रहेको बताएका छन्। उनले थपे, “यस परियोजनाले शिक्षामा रहेको खाडललाई कम गर्न र भविष्यका विद्यार्थीहरूलाई प्रौद्योगिकी मार्फत प्रतिस्पर्धात्मक बनाउन मद्दत पुर्याउनेछ।”
हुवावे नेपालका प्रमुख प्राविधिक अधिकारी ली सियाओवेईले यस परियोजनामा उत्साह व्यक्त गर्दै भने, “हुवावेले प्रविधिको शक्तिमा दृढ विश्वास राख्दै, ग्रामीण विद्यार्थीहरूलाई आधुनिक शैक्षिक उपकरणहरू र स्रोतहरू उपलब्ध गराउने प्रयास गरिरहेको छ।”
यस परियोजनाले नेपालको डिजिटल नेपाल फ्रेमवर्कलाई सुदृढ गर्दै हुवावेले देशको आईसीटी इकोसिस्टमलाई प्रगति गर्न र दिगो प्रविधिआधारित समाधानहरू प्रदान गर्न प्रतिबद्धता प्रकट गरेको छ।
