आज मिती २०८१ साल माघ महिनाको १४ गते सोमबार तदनुसार जनवरी महीनाको २७ तारीख सन् २०२५, माघ कृष्ण पक्षको त्रयोदशी तिथी, आज बिहान ६ बजेर ५२ मिनेटमा काठमाण्डौ उपत्यकामा झुल्कीएको घाम साँझ ५ बजेर ४० मिनेटमा अस्ताउने छ ।
मेष राशी: बोलीको गलत अर्थ लाग्ने, विवादमा परिने र आर्थिक अभावले सताउने समय भएपनि शुभचिन्तकहरूको साथले चुनौतीहरू पन्छाएर परिस्थिति अनुकूल बनाउन सकिनेछ । स्वास्थ्यमा सामान्य कमजोरी रहनुका साथै अवसरको खोजीमा केही दौडधुप गर्नुपर्ला । व्यावसायिक काममा भने केही चुनौती देखापर्ने योग छ ।
बृष राशि: टाढिएका आफन्तसँग पुनर्मिलन हुने समय हुनुका साथै जागिरमा हुनेहरूका लागि समय शुभदायक रहला । अप्ठ्यारा परिस्थितिसँग सम्झौता गर्नुपरे पनि लगनशीलताले लक्ष्यमा पुऱ्याउनेछ । स्थायी सम्पत्तिमा केही विवाद आउने योग रहेपनि आर्थिक समस्या सुल्झनुका साथै भौतिक साधनहरू जुटाउन सकिनेछ ।
मीथुन राशि: मंगलमय कार्य सम्पादन र सामाजिक दायित्व बहनमा आजको समय बित्नेछ । सन्तान वा अनुयायीले प्रसन्नता दिलाए पनि खराब व्यक्तित्वको विश्वासमा पर्नाले काममा धोका मिल्ने सम्भावना छ । आजको दिन सवारीसाधन एवम् हातहतियारको उपयोग सावधानीसाथ गर्नु तपाईको लागि हितकर हुनेछ ।
कर्कट राशि: नियमित काममा अनायासै बाधा वा हस्तक्षेप हुने सम्भावना रहेकाले आजका दिन विशेष सतर्क रहनुहोला । आर्थिक अभावले सताउन सक्छ । तपाईंका कमजोरीको अरुले फाइदा उठाउन सक्ने तथा परिवारका विशेष सदस्यको स्वास्थ्यसम्बन्धी समस्याले चिन्ता बढाउन सक्छ, ध्यान राख्नुहोला ।
सिंह राशि: आजको दिन समाजसेवा र परोपकारका कार्यमा मन जानेछ । व्यापार व्यवसायमा पनि सामान्य प्रगति हुनुका साथै कामको सन्दर्भमा शक्तिशाली व्यक्तिहरूसँग प्रतिस्पर्धा हुन सक्छ । धैर्य राख्न नसक्दा हातमा आएका अवसर गुम्न सक्ने तथा रोकिएको काम बन्नुका साथै नयाँ काममा पनि सफलता मिल्ने योग रहेको छ ।
कन्या राशि: विद्यार्थीहरूको लागि विशेष प्रगति हुने दिन रहेको छ । नयाँ उद्योग–धन्दाको थालनी गर्न सकिने भएपनि आफ्नै कमजोरीले परिवारजनमा असन्तुष्टि बढ्ने देखिन्छ, सचेत रहनुहोला । जीवनसाथीलाई केही पीडा हुने योग रहेपनि रोकिएका काम बन्नाले उत्साह जाग्ने समय रहेको छ ।
तुला राशी: सहयोगीको राम्रो साथ पाइने सम्भावना रहेपनि महत्वपूर्ण वस्तु गुम्ने सम्भावना रहेकाले सचेत रहनुहोला । आफ्ना काममा अरूले अधिकार जमाउने चेष्टा गर्नेछन् । शत्रुबाधा, मुद्दामामिला वा कामका विविध झमेलाहरूबाट भने मुक्ति मिल्ने योग रहेको छ ।
बृश्चिक राशि: आजका दिन अनावश्यक खर्च र ऋणभार बढ्ने देखिन्छ । स्वास्थ्यसम्बन्धी समस्याले सताउन सक्छ । राजनीतिक तथा सामाजिक प्रभाव कमजोर रहला । परिस्थितिलाई पछ्याउन नसक्दा अलिक पछि परिने तथा घरखर्च बढ्नुका साथै आयआर्जनमा कमी आउने सम्भावना छ ।
धनु राशि: मेहनत गर्दा राम्रै उपलब्धि हातलागी हुने समय छ । नयाँ व्यवसाय प्रारम्भ गर्न उपयुक्त रहनुका साथै व्यापार–व्यवसायमा फाइदा हुनेछ । दाम्पत्य सम्बन्ध पनि सुमधुर रहनुका साथै अरूको भरपर्दा काम बिग्रन सक्छ, सावधन रहनुहोला ।
मकर राशि: दाम्पत्य सम्बन्ध प्रगाढ हुनेछ भने सन्तान पक्षबाट प्रसन्नता मिल्नेछ । यात्रा सुखद रहनुका साथै धार्मिक तथा सामाजिक क्रियाकलापमा रुचि बढ्नेछ । परिवारजनको सहयोगले विशेष कामहरू बन्नेछन् । आश मारेको काम बन्नाले उत्साह जाग्ने योग रहेको छ ।
कुम्भ राशि: कृषिकर्म तथा पशु व्यवसायबाट राम्रो फाइदा हुने समय छ । स्थायी सम्पत्ति आर्जन हुनुका साथै बाहिरी यात्रामा भने कष्ट हुने देखिन्छ । साझेदारीको व्यवसायमा विवादको योग रहेपनि रोकिएका काम बन्नुका साथै बिस्तारै नयाँ काम सुरु हुनेछन् । सार्वजनिक कार्यक्रममा आकर्षण जाग्नेछ ।
र, मिन राशि: निजी व्यवसाय तथा कृषिकर्ममा परिश्रमको तुलनामा न्यून उपलब्धि हासिल होला । विपरीतलिंगीहरूप्रति आकर्षण बढ्नुका साथै प्रेम र मित्रताको बन्धन कसिने समय छ । सरोकार नभएका विषयमा रुचि राख्नाले दुःख पाइनुका साथै अरूको उक्साहटमा लाग्नाले बेफाइदा हुन सक्छ ।
