काठमाडाैं । अमेरिकी राष्ट्रपति डोनाल्ड ट्रम्पको आदेशपछि अमेरिकाले अवैध आप्रवासीहरू विरुद्ध व्यापक देश निकाला अभियान सुरु गरेको छ। यसैअन्तर्गत, सोमबार एक अमेरिकी सैन्य विमान अवैध आप्रवासीहरूलाई बोकेर भारतको लागि प्रस्थान गर्यो।
रोयटर्सका अनुसार अमेरिकी अधिकारीहरूले विमान कम्तिमा २४ घण्टाभित्र भारत आइपुग्ने पुष्टि गरेका छन्।
ह्वाइट हाउस फर्किएपछि राष्ट्रपति ट्रम्पको यो पहिलो भारतका विरूद्ध एक्सन हाे । ट्रम्पले भारतका प्रधानमन्त्री नरेन्द्र मोदी र विदेशमन्त्री एस जयशंकरसँग अमेरिकामा रहेका भारतीय अवैध आप्रवासीहरूको मुद्दामा छलफल गरेका थिए ।
यसअघि भारतले अवैध आप्रवासीहरूलाई फिर्ता लैजान सहमति जनाएको थियो र लगभग १८ हजार अवैध आप्रवासीहरूलाई फिर्ता गर्ने कुरा गरेको थियो।
ट्रम्प प्रशासनले अवैध आप्रवासीहरू विरुद्धको यो अभियानमा अमेरिकी सेनासँग पनि सहयोग मागेको छ। यसका लागि अमेरिका-मेक्सिको सीमामा थप सेना तैनाथ गरिएको छ र आप्रवासीहरूलाई राख्न सैन्य अड्डाहरू प्रयोग गरिँदैछ।
अवैध आप्रवासीहरूलाई फिर्ता पठाउन सैन्य विमानहरू प्रयोग गरिँदैछ। यसअन्तर्गत, आप्रवासीहरूलाई ग्वाटेमाला, पेरु र होन्डुरस जस्ता देशहरूमा निर्वासित गरिएको छ। एजेन्सीबाट
