काठमाडौं । नेकपा एकीकृत समाजवादीका महासचिव घनश्याम भुसालले नेकपा माओवादी केन्द्रका अध्यक्ष पुष्पकमल दाहाल प्रचण्ड चौथो पटक प्रधानमन्त्री हुनका लागि तयारीमा रहेको बताएका छन् ।
पार्टीको प्रथम उपत्यका प्रदेश अधिवेशनलाई सम्बोधन गर्दै भुसालले माओवादी कुनै सिद्धान्तमा नचलेको र भरपर्दो शक्ति नभएको बताएका छन्।
उनले भने, ‘सिद्धान्तमा चल्यो भने तीन चोटी प्रधानमन्त्री भइसके, उनले आफ्नो पार्टीको नाम माओवादी राख्दैनथ्यो। अब चार चोटी प्रधानमन्त्री हुन कस्सिरहेका छन्, चार चोटी भए पाँच चोटी हुन कसिन्छन्। पाँच चोटी भए देउवाजीजस्तै ६ चोटी हुन। अहिले उहाँहरुको पछिल्लो रिलेसन हेर्नुस् कोको सँग छ। उहाँले जसरी रविको मामलामा देखिनुभएको छ। रविमाथि सत्ताले बड्ता नगरोस् त्यो एउटा कुरा हो। तर, सहकारी पीडितले न्याय पाउनुपर्छ भन्ने भुलेर यदि भविष्यमा चितवनको टिकटको लागि मात्रै राजनीति गरेको हो भने त कम्युनिष्ट आन्दोलनमाथि ठूलो घात हुनेछ। वा के हो हेर्नुस्, किन हुँदैछरु हिजो समाजवादी मोर्चा चाहिएको थिएन, आज चाहिएको छ, भोलि के हुन्छ थाहा छ तपाईंहरुलाई नै।’
उनले प्रचण्डको चञ्चलतालाई मात्रै हेरेर निर्णय गरेर फेरि कमीकमजोरी हुने भएकाले सचेत हुनुपर्ने बताए।
