काठमाडाैं । दोस्रो कार्यकाल अमेरिका जस्तो शक्तिशाली देशको कार्यकारी प्रमुख भएपछि, व्यापारिक घरानाका राष्ट्रपति डोनाल्ड ट्रम्पले मुलुकलाई नाफामा लैजाने नीति लिएका छन् । एकपछि अर्को गर्दै आर्थिक तथा आप्रवासन नीतिमा व्यापक परिवर्तन ल्याएका छन् । चुनावी घोषणा पत्रमार्फत यी कुराहरू उनले पहिल्यै घोषणा गरिसकेका थिए र अब क्रमशः लागू गर्दै छन् ।
भर्खरै ट्रम्पले ‘गोल्ड कार्ड’ नामक नयाँ भिसा कार्यक्रम ल्याउने घोषणा गरेका हुन् र अब यो छिटो लागू हुँदै छ। उनी चाहन्छन् अमेरिकामा अब गरिब र शरणार्थी कोही नबसुन्। नेपाली रुपैयाँ करिब ७० कराेड तिरेपछि “गोल्ड कार्ड’ किन्न पाइने छ र सिधा अमेरिकाको नागरिकले पाए सरहको सुविधा प्राप्त गर्न सकिनेछ ।
राष्ट्रपति ट्रम्पको पहिलो सर्त अब अमेरिकामा विश्वका धनी व्यक्तिहरूलाई भित्र्याउने र अमेरिकालाई आर्थिक रूपमा सु–सम्पन्न गराउने। उनले सन्सारका धनाढ्य ब्यक्तिहरूलाई लक्ष्य गरी यो कार्यक्रम घोषणा गरेका हुन् ।
ट्रम्पका कार्ययोजनाहरुले अहिले एकाएक विश्वमा चर्चा पाएका छन्।
यो कार्ड किन्ने मानिसहरू युरोपेली, क्यानडेली र चाइनिज मूलका धेरै व्यापारीहरू हुनेछन् भन्ने अनुमान गरिएको छ। चाइनाका धेरैजसो नव धनाढ्य व्यापारीहरूलाई अमेरिकामा आफ्नो व्यापार फैलाउने र उतै स्वतन्त्र भएर बस्न पाउने नीतिले यो कार्यक्रम निकै प्रभावित हुने कुराको विश्वव्यापी चर्चा चल्न थालेको छ। ट्रम्पको यो कार्यक्रम पूर्ण सफल हुने र विश्वको सम्पत्ति अब अमेरिकामा थुप्रिने सम्भावना देखिएको छ।
नेपालीमा एउटा उखान छ ” जहाँ खाल्डो छ पानी त्यही जम्छ” जुन देश धनी छ अब विश्वको सम्पत्ति पनि त्यही गएर जम्मा हुनेछ। ट्रम्पले पैसालाई निकै महत्त्व दिइरहेका छन्। यो एउटा व्यापारीको धर्म पनि हो।
ट्रम्पले ओभल अफिसबाट घोषणा गरेका छन् कि, ‘तपाईँहरूसँग ग्रिन कार्ड छ, तर यो गोल्ड कार्ड हुनेछ । हामी यसको मूल्य करिब ५ मिलियन डलर राख्नेछौँ र यसले ग्रिन कार्ड भएकाहरूले पाउने अधिकारका साथै नागरिकता प्राप्तिको बाटो खोल्नेछ । धनाढ्य मानिस यो कार्ड किनेर हाम्रो देशमा आउनेछन् ।’ यस योजनामार्फत अमेरिकामा रोजगारदाताहरू भित्र्याई सार्वजनिक ऋण कम गर्न सकिने उनको तर्क छ। अब अमेरिकामा गरिबहरूको आप्रवासनलाई अझ निकै कडा गरिने सम्भावना बढेर गएको छ।
गोल्ड कार्ड नीतिले अमेरिकामा खरबौँ डलर भित्रिने छ र अमेरिका विश्व अर्थतन्त्रमा नम्बर एक भएर फेरि उदाउने छ भन्ने कुरामा ट्रम्प ढुक्क हुँदै छन्। ट्रम्पको यो योजनाबाट उनको देशमा ‘अति राम्रा र धनी मानिसहरू’ अमेरिका भित्रिने छन् र उनीहरूले अमेरिकालाई शक्तिशाली देश बनाउन मद्दत गर्नेछन्। रुस, चाइना , युक्रेन, युरोपेली मुलुकका कतिपय सम्पन्न व्यापारीहरू छिमेकी देश क्यानडाबाट ट्रम्पको यो नयाँ आप्रवासन नीतिलाई अनुसरण गर्नेछन्।
मानिसहरू आफ्नो सम्पत्तिको सधैँ सुरक्षा चाहन्छन् र ट्रम्पले उनीहरूको सम्पत्तिको सुरक्षा दिने जिम्मेवारी पनि लिएका छन्। यस कारण पनि विश्वका नवधनाढ्यहरुले आफ्नो सम्पत्तिको सुरक्षा स्थलको रूपमा अमेरिकालाई अब छान्ने छन्।
गरिब निकाल्ने धनी भित्र्याउने ट्रम्प नीतिको कतिले विरोध गरे पनि गरिब आप्रवासीहरूलाई देश निकाला गर्ने उनको कार्यकालको यो नै मुख्य नीति बनेको छ।
गोल्ड कार्ड’ किनेपछि सन्सारको जुनसुकै व्यक्तिले पनि अमेरिकामा बस्न र काम गर्न पाउनेछन् भने अमेरिकी नागरिकता लिने प्रक्रिया पनि सहज हुनेछ। विश्व मानवअधिकारवादी संस्थाहरुले भोलिका दिनमा यो बारेमा विरोध जनाए पनि ट्रम्प यति बेला कसैको कुरा सुन्ने वाला छैनन् ।
मुलुक बनाउन साँच्चिकै यस्तै कार्यकारी प्रमुख आवश्यकता रहेछ भन्ने कुराले अहिले विश्वमा चर्चा पाएको छ। हाम्रो देश नेपालका प्रायः सबै राष्ट्र प्रमुख तथा धनाढ्य व्यक्तिहरूले आफ्नो देशमा भ्रष्टाचार गरेर कमाएको धन विदेशी बैंकको खातामा जम्मा गरेका छन्। अझै पनि समय छ हाम्रो देशका धनीहरूले पनि ट्रम्प नीतिको अनुसरण पो गर्ने हुन कि ।
सम्बन्धित समाचार
