काठमाडौं । साताको अन्तिम कारोबार दिन (बिहीबार) सेयर बजार झिनो अंकले घटेको छ । बिहीबार २.७० अंकले घट्दै बजार २८१८.४३ को बिन्दुमा ओर्लिएको छ ।
बजार लगातार ३ कारोबार दिनदेखि ओरालोमा थियो । बजारमा लगातार उच्च अंकको गिरावट आएको थियो ।
तर, बिहीबार भने झिनो अंकले घट्दै बजारले करेक्सनको तह सकिएको संकेत गरेको छ ।
यस दिन कारोबारमा आएका १३२ कम्पनीको मूल्य घट्दा ९९ को मूल्य बढ्यो भने १२ को स्थिर रह्यो । गार्डियन माइक्रो फाइनान्स, भूगोल इनर्जी, उपकार लघुवित्त र राप्ती हाइड्रोको मूल्य सकारात्मक सर्किट लेबलमा बृद्धि हुँदा नबिलको डिबेन्चरमा १० प्रतिशतले गिरावट आयो ।
करेक्सन चलिरहे पनि बजारमा कारोबार रकममा खास गिरावट आएको छैन । १ करोड ९० लाख ४१ हजार कित्ता सेयर किनबेच हुँदा आज कारोबार रकम १० अर्ब १० करोड रुपैयाँ माथिको भयो ।
आज पनि कारोबार रकमका आधारमा हिमालयन रि इन्स्योरेन्स र नेपाल रि इन्स्योरेन्स शीर्ष स्थानमा रहे । हिमालयन रिको मात्रै १ अर्ब १२ करोड रुपैयाँमाथिको सेयर किनबेच भएको छ ।
लगातार ९ दिन १३७ अंककाे बृद्धिपछि बजारमा सोमबारदेखि गिरावट चलेकाे थियो । बुधबारसम्म मात्रै बजारमा ६९.१५ अंकको गिरावट आएको थियाे ।
तर, बिहीबार सामान्य उतारचढावसहित बजारमा आएको झिनाे अंककाे गिरावटले करेक्सन सकिएकाे संकेत गरेकाे छ ।
