काठमाडौं । पाकिस्तानमा विद्रोही लडाकु बलुच लिबरेशन आर्मी (बीएलए)ले जाफर एक्सप्रेसमाथि आक्रमण गरी अपहरण गरेको २४ घण्टा बितेको छ । योबिचमा जम्मा १०४ जनाको उद्धार भएको छ ।
यात्रुहरुको उद्धारका क्रममा भएको हानाहानमा १६ विद्रोही मारिएका छन् भने ३० सैनिक मारिएका छन् ।
क्वेटाबाट पेशावर जाँदै गरेको यो रेलमा लगभग ५०० जना थिए । यी यात्रुहरूमा धेरै पाकिस्तानी सैनिक र प्रहरीहरू थिए। बीएलएले यी यात्रुहरूमध्ये २१४ जनालाई बन्धक बनायो, जबकि ३० जना पाकिस्तानी सैनिकहरूलाई मारे ।
समाचार एजेन्सी एएफपीका अनुसार सुरक्षा बलले १०४ बन्धकहरूलाई रिहा गरेको छ। जसमा ५८ पुरुष, ३१ महिला र १५ बालबालिका छन्। बाँकीलाई मुक्त गर्ने कार्य जारी छ।
बीएलएले बन्धकहरूलाई युद्धबन्दीको रूपमा वर्णन गरेको छ र यसको बदलामा पाकिस्तानी जेलमा रहेका बलुच कार्यकर्ता, राजनीतिक कैदी, बेपत्ता व्यक्तिहरू, आतंककारी र पृथकतावादी नेताहरूको निःशर्त रिहाइको माग गरेको छ।
यसका लागि बीएलएले मंगलबार राति १० बजे पाकिस्तान सरकारलाई ४८ घण्टाको अल्टिमेटम दिएको छ।
जाफर एक्सप्रेसको रेल बिहान ९ बजे क्वेटाबाट पेशावरका लागि छुटेको थियो । सिबीमा यसको आगमन समय दिउँसो १ः३० बजे थियो।
यसअघि दिउँसो १ बजेतिर बलुचिस्तानको बोलान जिल्लाको मशकाफ क्षेत्रमा आक्रमण भएको थियो। राति १० बजे ८ घण्टा बितिसक्दा पनि रेल पूर्ण रूपमा बीएलए लडाकुहरूको नियन्त्रणमा थियो।
पाकिस्तानका गृह राज्यमन्त्री तलाल चौधरीले सुरक्षा बलले केही यात्रुहरूलाई रिहा गरेको बताए। धेरै मानिसहरूलाई रेलबाट ओरालेर पहाडी क्षेत्रमा लगिएको उनले बताएका छन् । बीएलए लडाकुहरूले महिला र बालबालिकालाई ढालको रूपमा प्रयोग गरिरहेको उनको भनाई छ ।
संयुक्त राष्ट्रसंघका महासचिव एन्टोनियो गुटेरेसले आक्रमणको निन्दा गरेका छन्। साथै, बलुच लडाकुहरूलाई बन्धकहरूलाई रिहा गर्न भनिएको छ। एजेन्सीबाट
