काठमाडौं । स्थानीय बजारमा सुनको मूल्यले नयाँ रेकर्ड कायम गरेको छ । अघिल्लो कारोबार दिनको तुलनामा प्रतितोला ४ हजार रुपैयाँले बढ्दै शुक्रबार सुनको मूल्य हालसम्मकै उच्च बिन्दुमा पुगेको हो ।
नेपाल सुनचाँदी व्यवसायी महासंघले जनाएअनुसार शुक्रबार सुनको मूल्य प्रतितोला १ लाख ७४ हजार ५ सय रुपैयाँ कायम भएको छ । यसअघि अघिल्लो कारोबार दिन बुधबार सुनको मूल्य १ लाख ७० हजार ५ सय रुपैयाँ थियो ।
यसअघि कात्तिक १५ मा सुनको मूल्य १ लाख ७१ हजार रुपैयाँ पुगेको थियो । शुक्रबारको मूल्य कात्तिक १५को भन्दा तीन हजार ५ सय रुपैयाँले बढी हो ।
यद्यपि, तत्कालिन समय भन्सारदर २० प्रतिशत थियो । तर, भन्सारदर २० प्रतिशतबाट १० प्रतिशतमा झरेपछि पनि मूल्यले नयाँ रेकर्ड बनाएको हो ।
सुनको मूल्यले नयाँ रेकर्ड कायम गर्दा शुक्रबार चाँदीको मूल्यमा पनि उच्च बृद्धि भएको छ । अघिल्लो कारोबार दिनको तुलनामा चाँदी प्रतितोला ५० रुपैयाँले बढेको महासंघले जनाएको छ ।
मूल्य बढेसँगै शुक्रबार चाँदीको मूल्य प्रतितोला २ हजार ५० रुपैयाँ कायम भएको महासंघले जनाएको छ ।
आज अन्तर्राष्ट्रिय बजारमा भने सुनको मूल्य प्रतिऔंश २९८४ डलर कायम छ ।
