काठमाडौं । साताको चौथो कारोबार दिन (बुधबार) पनि सेयर बजार परिसूचक (नेप्से) दोहोरो अंकले घटेको छ । लगातार तीन कारोबार दिनदेखि घटिरहेको नेप्से बुधबार १४.८८ अंकले घटेको हो ।
बुधबारको कारोबारसँगै नेप्से २६८२.१५ को बिन्दुमा ओर्लिएको छ ।
दोहोरो अंकले परिसूचक घट्दै गर्दा बुधबार अधिकांश समूहको सूचक घट्यो । व्यापार, सामूहिक लगानी र होटल तथा पर्यटन समूहको सूचकमा सामान्य बृद्धि हुँदा बाँकी समूहको सूचक घट्यो । बुधबार सबैभन्दा बढी फाइनान्स र जीवन बीमा समूहको सूचकमा गिरावट आएको छ ।
बुधबार कारोबारमा आएकामध्ये १८२ कम्पनीको मूल्य घटेको छ भने ५४ कम्पनीको मूल्यमा सामान्य बृद्धि भएको छ । ७ कम्पनीको भने मूल्य स्थिर रह्यो ।
नेप्से परिसूचक निरन्तर घटेपनि अघिल्ला कारोबार दिनको तुलनामा कारोबार रकममा भने सुधार आएको छ । ९५ लाख ८३ हजार कित्ता सेयर किनबेच हुँदा कारोबार रकम ५ अर्ब १४ करोड ३९ लाख रुपैयाँको भयो ।
कारोबार रकमका आधारमा हिमालयन रि इन्स्योन्स शीर्ष स्थानमा रह्यो । हिमालयन रिको मात्रै २९ करोड ६७ लाख रुपैयाँको सेयर किनबेच भएको छ ।
नेप्से २६ सयको मनोवैज्ञानिक बिन्दुमा ओर्लिँदै गर्दा लगानीकर्ता पनि निराश देखिएका छन् । जसको कारण कारोबार रकममा पनि सुस्ताएको देखिन्छ ।
अहिले बैंकको ब्याजदर निकै तल्लो विन्दुमा छ । बैंकिङ प्रणालीमा अधिक तरलताको अवस्था भइरहँदा अर्थतन्त्रका अन्य सूचकहरु पनि सबल बन्दै गएको देखिन्छ । तर, लगानीकर्ता मनोवैज्ञानिक हिसाबले स्पष्ट नहुँदा बजार बढ्न सकिरहेको छैन ।
