ओहायो, अमेरिका । नेपाली समुदायले निर्माण गरेको दशकौँको परिश्रम र इमानदार व्यावसायिक छवि अहिले गम्भीर आरोपहरूका कारण सङ्कटमा परेको छ। ओहायो राज्यमा सञ्चालित तीन नेपाली भाषी ग्रोसरी स्टोरहरू छानबिनको घेरामा परेका छन्। हाम्रो ग्रोसरी, हिमालयन ग्रोसरी, र इलाभेन ब्रदर्स ग्रोसरी अवैध जुवा सञ्चालन र सङ्घीय खाद्य सहायता (फुडस्ट्याम्प) दुरुपयोगमा संलग्न रहेको आरोपमा छानबिनको घेरामा परेका छन्।
उनीहरूलाई ६४ वटा अभियोग दर्ता भइसकेका छन्, जसमा अवैध जुवा सञ्चालन, आर्थिक अनियमितता, सङ्घीय सहायता कोषको दुरुपयोग, र वित्तीय ठगी समावेश छन्। नेपाली समुदायका केही व्यक्तिहरूले दशकौँ लगाएर उठाएको व्यापार, जसलाई उनीहरूले आफ्नो परिवारको भविष्यको रुपमा हेर्थे, अहिले कानुनी सङ्कटमा फसेको छ।
आरोपितहरूमध्ये रहेका टेक विश्व, रोब राई, सोमा राई, सुरज सुब्बा, सन्तोष अधिकारी, र सपना अधिकारी माथि गम्भीर अभियोग लागेका छन्। उनीहरूले स्टोरहरूलाई वैध व्यापारिक मोडेलको रूपमा सञ्चालन गर्दै, भित्री रूपमा भने अवैध कारोबार गरिरहेको प्रमाणित गर्ने प्रमाणहरू अधिकारीहरूले सङ्कलन गरिसकेका छन्।
अवैध जुवा सञ्चालन
स्टोरहरूको पछाडि लुकेको कोठामा, जहाँ विश्वासिला ग्राहकहरू मात्र प्रवेश गर्न सक्थे, जुवा खेलाइन्थ्यो। नेपाली भाषी समुदायका सदस्यहरू जुवा खेल्न आकर्षित भएका थिए। फुडस्ट्याम्पको दुरुपयोग, स्न्याप कार्डहरूको अवैध कारोबार गरी नगदमा बदल्ने, गैर-खाद्य वस्तुहरू बिक्री गर्ने, र अनधिकृत कारोबार गर्ने कार्य नियमित रूपमा भइरहेको थियो।
वित्तीय अनियमितता
अवैध रूपमा आर्जित धनलाई कानुनी रूपमा वैध देखाउने प्रयास गरिएको थियो। २०२२ देखि २०२५ को जनवरीसम्म अमेरिकी अधिकारीहरूले यी व्यापारहरूलाई गोप्य निगरानीमा राखेका थिए।
गुप्तचर एजेन्टहरू ग्राहकको रूपमा स्टोरमा गएर अवैध गतिविधिहरूको प्रमाण सङ्कलन गरे। अनुसन्धानको अन्तिम चरणमा, प्रहरीले बैङ्क विवरण, वित्तीय कारोबार र ग्राहकहरूको खरिद डाटा जाँच गर्दै स्टोरहरूमा छापा मारे। अवैध जुवा मेशिनहरू, नगद रकम, र फुडस्ट्याम्प कारोबारको रेकर्ड बरामद गरियो ।
नेपाली समुदायभित्र यो घटनाले ठुलो धक्का पुर्याएको छ। व्यवसाय सञ्चालन गर्ने अन्य नेपालीहरू पनि तनावमा परेका छन् । अब सरकारको निगरानी अझ कडा हुन सक्ने सम्भावना छ। धेरै व्यवसायीहरू अब आफ्नो कारोबार कानुनी रूपमा सुरक्षित छ कि छैन भनेर समीक्षा गरिरहेका छन्।
‘हामीले यहाँ दसौँ वर्षसम्म मेहनत गरेर इमानदार व्यापार चलाएका छौँ। केही व्यक्तिहरूको गल्तीले गर्दा सबै नेपाली व्यवसायीहरू शङ्काको घेरामा पर्नु दुःखद छ,’ ओहायोका एक नेपाली व्यवसायीले भने।
यो घटनाले अमेरिकी नेपाली व्यवसायीहरूलाई एउटा गम्भीर सन्देश दिएको छ । व्यावसायिक कानुनी नियमहरूको पालना अनिवार्य छ। अवैध गतिविधिहरूले व्यवसाय मात्र होइन, समग्र समुदायको प्रतिष्ठामा समेत असर पार्छ।
नेपाली समुदायका लागि यो घटना गहिरो आत्म मन्थन गर्ने क्षण हो। मेहनतले उठाइएको व्यवसायलाई सस्तो लाभको लागि जोखिममा राख्नुले दीर्घकालीन रूपमा ठुलो क्षति पुर्याउन सक्छ। अमेरिकामा इमानदार रूपमा व्यवसाय सञ्चालन गर्ने नेपालीहरूको पहिचान सुरक्षित राख्न, अब समुदायको ऐक्यबद्धता र जिम्मेवारी अझै महत्त्वपूर्ण बन्न पुगेको छ ।
