काठमाडौं । रुकुमपश्चिमको आठबिसकोटस्थित नापी कार्यालयको डिजिटल बोर्ड ह्याक भएको छ। ह्याक भएपछी अहिले त्यहाँ ‘प्रमिला म तिमीलाई माया गर्छु, साँच्चै माया गर्छु’ लेखिएको छ।
कार्यालयका प्रमुख मानबहादुर आग्रीले कार्यालयको डिजिटल बोर्ड ह्याक भएर नै असान्दर्भिक कुरा डिस्प्ले भएको जानकारी दिए।
सामाजिक सञ्जालमा उक्त फोटो भाइरल भएको विषयमा उनले भने, ‘म आफन्त बित्नु भएकोले शोकमा छु, कार्यालयको डिजिटल बोर्डमा अनावश्यक कुराहरू प्रशारण भएको जानकारी पाएँ। कसरी भयो, सुनेर अचम्मित भएको छु।’
नापी कार्यालय आठबिसकोटमा प्रमिला नामको कोही पनि कर्मचारी नभएको तर उक्त नाम अङ्कित गरेर डिस्प्ले भएको उनको भनाइ छ।
यसअघि पनि आठबिसकोटकै एक क्याम्पसको डिजिटल बोर्ड समेत ह्याक भएको थियो।
यस विषयमा आठबिसकोट नगरपालिकाका सूचना अधिकारी इन्द्रबहादुर विष्टले समेत ह्याक भएको हुनसक्ने भन्दै जिल्ला प्रशासन कार्यालयमा जानकारी गराइएको बताए।
