काठमाडौं : शुक्रबार भएको हिंसात्मक राजावादी आन्दोलनमा भाटभटेनी सुपरमार्केटबाट लुटपाट गर्ने ९ जना पक्राउ परेका छन्। दुर्गा प्रसाईको नेतृत्वमा राजावादी समूहसहितको संयुक्त आन्दोलनका क्रममा कोटेश्वरस्थित भाटभटेनी सुपरमार्केटमा तोडफोड गर्नुका साथै लुटपाट गरेर फरार भएका ९ जना पक्राउ परेका हुन्।
पक्राउ पर्नेमा धनुषाको मिथिला नगरपालिका-६ ढल्केवरका आशिष सिंह, सर्लाहीको बरथहवा नगरपालिका-१६ प्रेम कुमार महतो, भारतको बिहार राज्य पटना हाजिपुरका रवि रञ्जन कुमार, नुवाकोटको विदुर नगरपालिका-६ की सुशीला कुमाल, सुनसरीको धरानकी एलिसा राई, काठमाडौं महानगरपालिका-३२ की बालकुमारी कार्की, सिन्धुपाल्चोक चौतारा साँगाचोकगढी नगरपालिका-८ की निर्मला कार्की, सिन्धुलीको तिनपाटन गाउँपालिका-७ लाम्पन्टारकी चित्र माया बस्नेत र सिन्धुलीको तिनपाटन गाउँपालिका-१६ की सुस्मिता बराल रहेका छन्।
काठमाडौं उपत्यका अपराध अनुसन्धान कार्यालयको टोलीले उनीहरूलाई शनिबार र आइतबार पक्राउ गरेको हो। पक्राउ परेकाहरूको साथबाट ब्ल्याक लेबल १ थान, ज्याक जेनिल २ थान, महतोको साथबाट ४ थान खाली बियरको बोतल र कुमारको साथबाट यार्सागुम्बा ब्राण्डको मदिरा १ थान बरामद भएको छ।
त्यस्तै, पक्राउ परेका अन्य ७ जनाको साथबाट हाफपाइन्ट टाउजर, ट्रेक्यारेट, फलफूल, लिपिस्टक गाजल र अन्य सामानहरु बरामद भएको छ। कार्यालयका प्रहरी उपरीक्षक अंगुर जिसीले पक्राउ परेकाहरू कोटेश्वरमा बस्दै आएकाहरू रहेको बताए।
अन्य व्यक्तिको खोजी भइरहेको प्रहरीले जनाएको छ।
