काठमाडौं । प्रधानमन्त्री केपी ओलीले आइतबार साँझ बोलाएको सर्वदलीय बैठकमा राष्ट्रिय प्रजातन्त्र पार्टी (राप्रपा) लाई निषेध गरियो। गणतन्त्र पक्षधर भनिएको सर्वदलीय बैठकमा राप्रपालाई नबोलाइएको एमालेका मुख्य सचेतक महेश बर्तौलाले जानकारी दिए।
तर, त्यस बैठकमा राष्ट्रिय स्वतन्त्र पार्टी (रास्वपा) लाई पनि बोलाइएन। संसदको चौंथो ठूलो दल रास्वपालाई उपेक्षा गरिएको प्रमुख सचेतक सन्तोष परियारले बताए।
रास्वपा घोषितरुपमा गणतन्त्रवादी दल नै हो। संसदमा राजसंस्था पक्षधर दल राप्रपा मात्रै छ।
बैठक अहिले ७ बजे सिंहदरबारमा बस्दैछ। वैठकमा संसदको चौंथो र पाचौं ठूला शक्ती छुट्ने भएका छन्। राप्रपालाई यसअघि प्रतिपक्षी गठवन्धनको बैठकमा पनि सामेल गरिएको थिएन।
शुक्रबार राजधानीको तीनकुनेमा राजावादीहरूले हिंसात्मक गतिविधि गरेपछि प्रधानमन्त्री ओलीले गणतन्त्र पक्षधरहरूको बैठक बोलाएका हुन्।
