काठमाडौं । नेकपा एमालेका अध्यक्ष केपी शर्मा ओली, नेकपा एकीकृत समाजवादीका अध्यक्ष माधवकुमार नेपाल र मातृभूमि राष्ट्रिय अभियान चलाइरहेका डा. भीम रावल एकै ठाउँ नदेखिएको लामै समय बितिसकेको छ।
तर, सोमबार एकीकृत समाजवादीको आलोकनगरस्थित केन्द्रीय कार्यालयमा एकजना पुराना वामनेता तथा लेखक कमल कोइरालालाई श्रद्धाञ्जली दिने क्रममा यी तीन नेता एकैठाउँ देखिए।
कोइरालाको निधन भएपछि एकीकृत समाजवादीले श्रद्धाञ्जली कार्यक्रम आलोकनगरमै राखेको थियो। त्यसपछि प्रधानमन्त्री केपी शर्मा ओली संसद्लाई सम्बोधन गरेर त्यहीँ पुगे।
माधवकुमार नेपाल आलोकनगरमै थिए। अनि एमालेबाट निष्काशित पूर्वउपाध्यक्ष डा. भीम रावल पनि आलोकनगर पुगे।
त्यसपछि ओलीले गत शुक्रबार राजावादीका नाममा अराजक समूहले तोडफोड र आगजनीबाट भएको क्षतिको विवरण पनि माधवसँगै घुमेर जानकारी लिए।
श्रद्धाञ्जली समारोहपछि ओली नेपाल र डा. रावल लहरै बसे। उनीहरूको ठीक सामुन्ने सम्मानित नेता झलनाथ खनाल बसेका थिए। ओली र नेपाल बसेको लहरको पल्लो छेउमा नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठ थिए।
प्रधानमन्त्री ओलीको सचिवालयले सार्वजनिक गरेको तस्बिरमा झलनाथ र प्रधानमन्त्री संवाद गरिरहेको देख्न सकि्न्छ। ओली, नेपाल, खनाल र रावलसहितको फोटो राखेर नेकपा एसका उपाध्यक्ष तथा प्रवक्ता प्रकाश ज्वालाले फेसबुकमा लेखेका छन्, ‘आइस ब्रेक !’
