काठमाडौं : यहीँ चैत २२ गतेबाट प्रदर्शनमा आउन लागेको फिल्म ‘वसन्त’को तेस्रो गीत ‘हेर्दै आँखामा’ अहिले चर्चामा छ। प्रदर्शनमा आउनु ५ दिन बाँकी छँदा यसले फिल्मको प्रमोसनलाई हाइप दिएको छ।
गीतमा सुगम पोखरेल र समिक्षा अधिकारीले गाएका छन्। फिल्मका कथाकार, लेखक तथा निर्देशक प्रकाश सपुतको शब्द तथा संगीतमा बनेको यो गीतलाई संगीत संयोजन योगेश काजीको छ।
गीतमा मुख्य पात्र वसन्तले विभिन्न धर्म र संस्कार अनुसार विवाह गरेको देखाइएको छ। यसले कथा र मर्मलाई चित्रण गर्ने भनिएको छ।
मानिस जुनसुकै जात, धर्म अनि वर्गको भएपनि एक नै भएको सन्देश ‘हेर्दै आँखामा’मा देख्न सकिन्छ। त्यसैले पनि अहिले यो चर्चामा छ।
भिडियोमा फिल्मका मुख्य कलाकार प्रकाश र स्वस्तिमा खड्कालाई देख्न सकिन्छ। उनीहरुलाई फिल्मको कथा अनुसारकै संवादबाट गीतलाई भिडियोमा उठाइएको छ।
यो फिल्ममा प्रकाश र स्वस्तिमाका अलवा प्रभात पाल ठकुरी, खड्गबहादुर पुन, शिभान्सी श्रीको पनि अभिनय रहेको छ। गलबन्दी प्रोडक्सनबाट बनेको यो फिल्मको निर्मातामा मोहन विश्वकर्मा र बिन्दु बोहोरा छन्।
कार्यकारी निर्मातामा बिरेन्द्र नारायण श्रेष्ठ, अनुरोध भट्टराई र नाना थकाली छन्। मुख्य सह–निर्देशन सुनिल विकको छ। प्रोजेक्ट हेड दिल शिरीष हुन्।
