काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले सभामुख देवराज घिमिरेलाई आफ्नो सांसद पद निलम्बन फुकुवाको लागि दोस्रो पटक आग्रह गरेका छन् । मंगलबार सभामुख घिमिरेलाई भेट्न लामिछाने संसद सचिवालय पुगेका थिए ।
यसअघि पनि गत माघ १८ गते उनले सभामुख घिमिरेलाई भेटेर सांसद पद निलम्बन फुकुवा गर्न आग्रह गरेका थिए ।
लामिछानेले आफ्नो सांसद पदको निलम्बन गैरकानुनी र राजनीतिक प्रतिशोधपूर्ण रहेको जिकिर गर्दै आएका छन् । उनले आफूमाथि राजनीतिक पूर्वाग्रह साँधिएको बताउँदै आएका छन् ।
“जन्मिनुभन्दा अघि बुवाको सम्पत्ति र विवाहभन्दा अघि श्रीमतीको सम्पत्तिलाई कसुर मानेर खाली सांसद पद कसरी निलम्बन गर्न सकिन्छ भनेर दूषित मनसाय राखेर दर्ता मात्र गरिएको अदालतमा टेकाइएको मुद्दाको आधारमा निलम्बन हुनु हुँदैन भनेर भनेको छु, मुद्दा किनारा लाग्न कति समय लाग्छ हामीलाई थाहा छ नि”, मंगलबार सभामुखसँगको भेटबारे लामिछानेले भनेका छन् ।
सभामुखले आफ्ना कुरालाई सकारात्मक ढंगले लिएको बताए पनि निष्कर्ष भने नदिएको उनले सुनाएका छन् । “मेरो तर्फबाट राखेको कुरालाई उहाँले सकारात्मकरुपमा लिनुभयो, उहाँले परम्परा, कानुनी पाटो सबै केलाएर निर्णय लिन्छु भन्नुभएको छ”, लामिछानेले सभामुखसँगको कुराकानीबारे भनेका छन् ।
लामिछानेले अघि सारेका २ तर्क
लामिछानेले सांसद पद फुकुवाको लागि मुख्यगरी २ वटा तर्क अघि सारेका छन् । उनले आफूलाई जस्तै अन्यमाथि पनि सम्पत्ति शुद्धिकरणको मुद्दा दायर भएमा के हुने ? भन्ने प्रश्न सभामुखलाई तेर्स्याएका छन् ।
“ममाथि जसरी मुद्दा दर्ता गरियो, खाली कसरी सांसद पद निलम्बन गर्न सकिन्छ भनेर दूषित मनसाय राखेर मात्रै अदालतमा मुद्दा दर्ता गराइयो, यसले भोलि प्रतिशोधको रूप नलेला भन्न सकिन्छ ?”, सभामुखसँगको कुराकानीबारे लामिछानेले भनेका छन्, “राजनीतिक हतियार नबन्ने विषय रहेन, सरकारको संख्यामै तलमाथि हुँदा मुद्दा टेकाइदिए त पुग्यो नि !”
सँगै, लामिछानेले सभामुखसमक्ष मतदातामाथि अन्याय भएको तर्क गरेका छन् । आफूलाई मत हाल्ने चितवनका मतदाताले अन्याय भोगिरहेको तर्क लामिछानेको छ ।
“चितवनका जनताले २र२ पटक भोट दिएर पठाएका छन् मेरो सांसद पद कसरी खाली हुन्छ ? यो उहाँहरूमाथि अन्याय होइन ?”, लामिछानेले भनेका छन् ।
२ महिनापछि सक्रिय
सहकारी ठगी, संगठित अपराध र सम्पत्ति शुद्धीकरण अभियोगमा मुद्दा दर्ता भएसँगै लामिछानेको सांसद पद निलम्बन भएको थियो । मुद्दा दर्ता भएकै दिन गत पुस ८ गते संसद सचिवालयले उनको सांसद पद निलम्बन गरेको पत्र टाँसेको थियो ।
लामिछानेमाथि कास्की, काठमाडौं, चितवन र रुपन्देही जिल्ला अदालतमा मुद्दा विचाराधीन अवस्थामा छन् । पर्सामा पनि उनको मुद्दामाथि अनुसन्धान चलिरहेको छ ।
पोखराको सूर्य दर्शन सहकारी ठगीमा ६५ लाख, काठमाडौंको स्वर्णलक्ष्मी सहकारी ठगीमा ६० लाख, रुपन्देहीको सुप्रिम सहकारीमा १ करोड र चितवनको सहारा सहकारी ठगीमा ५४ लाख रुपैयाँ धरौटी बुझाइसकेका छन् । तर, वीरगन्जको सानो पाइला सहकारीको हकमा भने मुद्दा दायर भएको छैन ।
लामिछानेको सन्दर्भमा पछिल्लो पटक माघ २४ मा चितवन जिल्ला अदालतले धरौटीमा रिहा गर्न आदेश गरेका थियो । जसपश्चात् उनी खुला छन् । उनले बाहिर बसेरै मुद्दा लडिरहेका छन् ।
झन्डै २ महिना गुमनाम जीवन बिताएका लामिछाने पछिल्लो समय सक्रिय भएका छन् । सोमबार मात्रै उनले रास्वपाभित्र पार्टी सभापति जिम्मेवारी पुनः लिएका थिए ।
