काठमाडौं । साताको दोस्रो कारोबार दिन (मंगलबार) सेयर बजार परिसूचक (नेप्से)मा दोहोरो अंकको गिरावट आएको छ । मंगलबार १६.९५ अंकले घट्दै नेप्से २६७६.१७ को बिन्दुमा ओर्लिएको छ ।
दोहोरो अंकको गिरावटका बिच अधिकांशजसो समूहको सूचक घट्यो । व्यापारको सूचक भने ३.८० प्रतिशतले बृद्धि भएको छ ।
आज कारोबारमा आएका अधिकांश कम्पनीको मूल्य घट्यो । २०१ कम्पनीको मूल्य घट्दा ४२ कम्पनीको मात्रै मूल्य बढ्यो ।
परिसूचक घट्दै गर्दा कारोबार रकममा पनि गिरावट आएको छ । मंगलबार १ करोड ६ लाख ७० हजार कित्ता सेयर किनबेच हुँदा कारोबार रकम ५ अर्ब ७९ करोड ७७ लाख रुपैयाँको भयो ।
जुन अघिल्लो कारोबार दिनको तुलनामा डेढ अर्ब बढीले कम हो ।
यसअघि लगातार ३ कारोबार दिन सेयर बजार बढेको थियो । ३ कारोबार दिनकै बिचमा ११० अंकले बजार बढेको थियो ।
मंगलबारको गिरावटले बजारमा करेक्सन भएको देखाउँछ । बजारका जानकारहरुका अनुसार स्वभाविकरुपमा बजार घटबढ भइरहन्छ ।
