काठमाडौं । सहकारी ठगीमा फरार राप्रपा सांसद गीता बस्नेतले संसद्मा स्वास्थ्य उपचारमा रहेको सूचना पठाएकी छिन्। सभामुख देवराज घिमिरेले मंगलबार सांसद बस्नेत स्वास्थ्योपचारका रहेकाले अनुपस्थित रहेको सूचना सुनाए।
संसद् सचिवालयका अनुसार बस्नेत २०८१ माघ १८ गतेदेखि मंगलबारसम्म बसेका २७ वटै बैठकमा अनुपस्थित रहेकी हुन्। यसबीचमा उनले सांसदको रुपमा प्राप्त गर्ने तलबभत्ता र सेवासुविधा लिइरहेकी छन्।
नवलपरासीको छिपछिपे, चितवनको सनराइज र बर्दियाको नमस्ते सहकारी ठगीमा मुछिएकी सांसद बस्नेत भने संसद् अधिवेशन सुरु नहुँदैदेखि फरार रहेकी थिइन्।
सांसद बस्नेतविरुद्ध गत १४ वैशाखमा पक्राउ पुर्जी जारी भएको थियो। सहकारीको बचत हिनामिनामा मुछिएलगत्तै राप्रपाले भने सांसद बस्नेतविरुद्ध अनुसन्धान गर्न सरकारसँग माग गरेको थियो।
नवलपरासीको छिपछिपे सहकारीमा २ हजार ३ सय बचतकर्ताको १६ करोड ५८ लाख हिनामिनाको हिसाब खोज्ने क्रममा बस्नेत सञ्चालक रहेको बर्दियाको रिसोर्टमा ९६ लाख ऋण लगानी गरेको खुलेको थियो।
त्यस्तै चितवनको सनराइज सहकारीबाट रिमाल, ढुण्डीराज गौतम र कृष्ण ज्ञवालीका नाममा करिब ९ करोड र बर्दियाको नमस्ते सहकारीबाट सञ्जीवकुमार महतोका नाममा २५ लाख निकालेर रिसोर्टमा लगानी भएको छ।
