काठमाडौं । नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल प्रचण्डले विवादित मेडिकल व्यवसायी दुर्गा प्रसाईको घरमा पुगेर चरेसको थालमा मार्सी चामलको भात खाएकै दिनदेखि प्रसाईंको राजनीतिक हाइप ह्वात्तै बढ्यो। दुई ठूला कम्युनिस्ट पार्टीका अध्यक्षहरूले नै आफ्नो घरमा खाना खाइदिएपछि प्रसाईं हौसिए। अनि त्यही बेलादेखि समाजमा आफूलाई स्थापित गराउन अनेकौ हर्कत गर्न थाले।
ससुरालीको सम्पत्ति हड्पन माओवादी बनेको आरोप लाग्दै आएका प्रसाईंले तत्कालीन समयमा सेनाको हिरासतको अनुभव समेत पाएका छन्। माओवादीको स्थानीय नेतृत्वले कयौंपटक आलोचना गर्दागर्दै आफ्नो कुटिल रणनीति, बोलीको प्रभाव र सपनाको व्यापार मार्फत प्रचण्डको किचन क्याबिनेटकै सदस्य सरह हैसियत बनाउन सफल भएका प्रसाईं कालान्तरमा आफ्नै निवासमा ओली प्रचण्डलाई बोलाएर मार्सी भात खुवाएपछि उनी उदाएका हुन्।
त्यसपछि त माओवादी केन्द्र र एमालेको संयुक्त गठबन्धनसहित पार्टी एकतामा पनि आफ्नो भूमिका रहेको दाबी गर्दै ओली प्रचण्ड मार्फत नै आफ्नो बिएन्डसी मेडिकल कलेजलाई सम्बन्धन दिलाउने प्रयासमा जुटिरहे प्रसाईं। समयक्रममा ओली-प्रचण्डको स्वार्थको टकरावका बिच सर्वोच्च अदालतले एमाले-माओवादी एकता खारेज गरेपछि एमालेमै बसेका प्रसाईंलाई ओलीले केन्द्रिय सदस्यको पद नै पुरस्कार दिए। जसको कारण प्रसाईंको आजको हैसियत बन्न टेवा पुग्यो।
गएको फागुन ७ यता सक्रिय राजनीतिमा आउने संकेत गरेका पूर्वराजा ज्ञानेन्द्र शाहलाई फागुन २५ मा त्रिभुवन विमानस्थल परिसरदेखि निर्मल निवाससम्मको स्वागत समारोह होस् वा १५ चैतमा आफ्नै नेतृत्वमा आयोजना गरेको शक्ति प्रदर्शनमा प्रहरीमाथी नै गाडी चलाउने दुस्साहस गर्ने प्रसाईं उनै ओलीको लागि टाउको दुखाइ बनिरहेका छन्।
अझ १५ चैतको शक्ति प्रदर्शनका क्रममा दुई जनाले ज्यान गुमाउनुका साथै, सरकारी, निजि सम्पत्तिमा आगजनी तथा भाटभटेनी सुपर मार्केट लुटपाट जस्ता हिंसात्मक घटना भएपछि शुक्रवारसाँझ देखि नै फरार भएका प्रसाईं त्यसयता सुरक्षा निकायको पहुँचबाहिर भएको बताइन्छ। तर, प्रसाई भने सामाजिक सञ्जालबाटै भिडियो सार्वजनिक गरेर प्रहरीलाई चुनौती दिइरहेका छन्।
दुर्गा प्रसाईं र पक्राउ परेका व्यक्तिहरूको विषयमा सोमबार दिउँसो उपत्यका प्रहरी कार्यालयका प्रमुखहरूको बैठकमा प्रहरी महानिरीक्षक दीपक थापाले गरेको छलफलमा प्रसाई भागेर भारत पुगिसकेको निष्कर्ष निकालिएको छ। प्रसाईले आइतबार एउटा मन्दिरमा बसेर बनाएको भिडियो सार्वजनिक भएकोमा उक्त भिडियो नेपालको नभएको प्रहरीले निष्कर्ष निकालेको हो।
प्रसाईंको भिडियो सार्वजनिक भएलगत्तै प्रहरीले यो खालका मन्दिर तराई क्षेत्रमा हुने सम्भावनालाई मध्यनजर गर्दै नवलपरासीदेखि झापासम्म फोकस भएर हेर्दा पनि त्यस्तो मन्दिर नभेटिएको भन्दै प्रसाई भारत पुगिसकेको निष्कर्ष निकालेको हो। प्रसाईं तिनकुनेमा हिंसात्मक प्रदर्शन भएकै राती कान्तिलोकपथको बाटो हुँदै भारत प्रवेश हुनसक्ने आशंका गरेको छ।
अहिलेसम्म प्रसाईं निकटका सबै सहयोगी प्रहरी नियन्त्रणमा भएपनि उनको अवस्था अज्ञात रहँदा उनी भने सामाजिक सञ्जाल मार्फत सिंगो राज्यलाई चुनौती दिइरहेका छन्। अहिले सत्ता र प्रतिपक्षमा रहेका ओली र प्रचण्डकै काखमा बसेर आफ्नो चरम राजनीतिक महत्वाकांक्षा हुर्काएका प्रसाईं पूर्वराजा ज्ञानेद्र शाहकै विश्वास जितेर १५ गतेको शक्ति प्रदर्शनको जनकमान्डर बने। तर उनै प्रसाईंका कारण पूर्वराजा शाह समेत यतिबेला सरकारको उच्च निगरानीमा छन्।
चैत १५ को अवसरमा गणतन्त्रवादी र राजावादीले एकसाथ शक्ति प्रदर्शनको घोषणा गरेपनि राजावादी समूहलाई त्यति महत्त्व नदिएको गृह प्रशासन आफै प्रदर्शन हिंसात्मक बनेपछि दबाबमा छ। नेपाल प्रहरी र नेपाली सेनाको इन्टिलेजेन्स विभागले राजावादीको प्रदर्शन उग्र हुने पूर्वजानकारी दिंदादिदैं आन्दोलनका क्रममा ठूलो क्षति भएपछि गृह प्रशासन प्रसाईंलाई जतिसक्दो छिटो कानुनी दायरामा ल्याउनुपर्ने दबाबमा छ।
१५ गतेको प्रदर्शनमा गृह प्रशासन निकम्मा देखिएको भन्दै प्रतिपक्षी दल राष्ट्रिय स्वतन्त्र पार्टीका सभापति रवि लामिछानेले त गृहमन्त्री रमेश लेखकको राजीनामा मागिसकेका छन्। हुन त प्रधानमन्त्री केपी शर्मा ओलीले नै संघीय संसद मार्फत यो घटनाकापछि पूर्वराजा शाहकै हात रहेको आरोप लगाउँदै घटनामा संलग्न कसैलाई नछाड्ने चेतावनी दिएका छन्।
