काठमाडौं । काठमाडौंको तीनकुनेमा चैत १५ गते राजावादी प्रदर्शनका क्रममा भएका हिंसा, तोडफोड, आगजनी तथा लुटपाटको जिम्मेवारी निर्मल निवासले नलिने भएको छ।
पूर्वराजा शाहका संवाद सचिव डा. फणिराज पाठकले विभिन्न संचारमाध्यममा चैत १५ गतेको प्रदर्शन पूर्वराजा ज्ञानेन्द्रको निर्देशनमा नभएको दाबी गरे।
त्यस दिन जसले प्रदर्शनको आयोजना गरेको हो, उही घटनाको जिम्मेवार हुने उनले बताए।
उक्त प्रदर्शनको आयोजना नवराज सुवेदीको संयोजकत्वमा गठित राजसंस्था पुन: स्थापनाका लागि ‘संयुक्त जनआन्दोलन समिति’ले गरेको थियो। जसमा राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्र र महामन्त्री धवलशमशेर राणा पनि सहभागी थिए।
रवीन्द्र र धवलशमशेरसहित ४१ जनाविरुद्ध मुद्दासमेत दर्ता गरिसकेको छ भने मंगलबारसम्म थप २० जनालाई पक्राउ गरिएको प्रहरीले जानकारी दिएको छ।
त्यस राजावादी प्रदर्शन हिंसात्मक बन्दा दुई जनाले ज्यान गुमाएका थिए। थुप्रै घाइते भएका थिए भने सर्वसाधारणका घर, व्यापारिक प्रतिष्ठानहरू, सञ्चारमाध्यम, राजनीतिक पार्टीका कार्यालय तथा सरकारी र निजी दर्जनौं सवारीसाधनमा तोडफोड र आगजनी भएको थियो।
तर उक्त हिंसाको अघिल्लो दिन पूर्वराजा शाहले दुर्गा प्रसाईंलाई निर्मल निवासमै बोलाएर निर्देशन दिएको भन्ने आरोपमा भने उनले आफूलाई थाहा नभएको बताए।
‘अब उहाँले ककसलाई भेट्नुहुन्छ, सबै जानकारी त मलाई हुँदैन’, शाहका संवाद सचिव पाठकले भने, ‘तर दुर्गालाई उहाँले कमान्डर तोक्नुभएको होइन, राजाले निर्देशन दिनुभएको होइन।’
बालेनको जरिवानाको लागि पूर्वराजा छैनन् जिम्मेवार
त्यस हिंसात्मक आन्दोलनका क्रममा फोहोर तथा तोडफोड गरेको भन्दै काठमाडौं महानगरपालिकाले त्यसको प्रमुख जिम्मेवार पूर्वराजा शाह नै भएको ठहर गर्दै जरिवाना नै तोकेको छ। विभिन्न शीर्षकमा ७ लाख ९३ हजार रूपैयाँ जरिवाना ज्ञानेन्द्र शाहको नाममा बालेनले जरिवाना पत्र काटेका थिए।
तर उक्त पत्र निर्मल निवासले बुझ्न नमानेपछि हुलाकमार्फत निर्मल निवासलाई पत्र पठाइएको छ। फेरि निर्मल निवास भने यसबारे अहिलेसम्म मौन छ।
यस विषयमा संवाद सचिव डा. पाठकले भने, ‘उहाँले जिम्मेवारी लिइबक्सन्न। जुन समितिले कार्यक्रम गरेको छ, जरिवाना उसैसँग लिनपर्यो। यत्ति कुरा त मेयरजस्तो मान्छेले नबुझ्या होला जस्तो लाग्दैन।’
उनले यस निर्णयमा बालेनले पुनर्विचार गर्नुपर्ने बताए।
‘त्यस दिन कार्यक्रमका लागि जिल्ला प्रशासनले फलानोलाई स्वीकृति दिने, त्यहीअनुसार कार्यक्रम गर्ने, अनि जिम्मेवारी राजालाई आउने हुन्छ र’, पाठकले भने, ‘त्यस्तो पनि अनुसन्धान हुन्छ र! उहाँ (बालेन) ले रिअलाइज गर्नुहोला, करेक्सन गर्नुहोला। मिस्टेक भयो भने करेक्सन हुन्छ।’
संवाद सचिव पाठकले फागुन २५ गतेको कार्यक्रम मात्र पूर्वराजा शाहको भएको जिकिर गरे। त्यस दिन झन्डै १ महिनाको भ्रमणपछि पोखराबाट फर्किएका पूर्वराजा शाहलाई राप्रपा, राप्रपा नेपाल र दुर्गा प्रसाईं समूहलगायत राजावादीले भव्य स्वागत गर्दै गणतन्त्रविरुद्ध नारा लगाएका थिए।
‘काठमाडैँमा त्यसरी पोखराबाट शालीन रूपमा आउनुभएएको होइन? उहाँले आह्वान गरेको फागुन २५ गतेको कार्यक्रम पो हो’, पाठकले भने, ‘उहाँले त्यतिबेला माससँग म नारायणहिटी जान्छु भनिबक्स्यो त? मान्छेहरूले त जे पनि भन्छन्।’
यता, सरकारले भने उक्त हिंसात्मक प्रदर्शनमा पूर्वराजा शाह जोडिएको, उनले सम्झौता उल्लंघन गरेको निष्कर्ष निकालेको छ।
प्रधानमन्त्री केपी शर्मा ओलीले प्रतिनिधिसभामा सोमबार बोल्दै आपराधिक घटनामा कसैले पनि उन्मुक्ति पाउनुहुँदैन, पूर्वराजाले फेरि राजा बन्छु भन्ने चाहेको हो भने पछिल्ला शंखलाबद्ध घटनाबारे आफ्नो धारणा सार्वजनिक गर्नुपर्ने भनेका छन्।
