काठमाडौं । अभिनेत्री अञ्जना बराइलीले ‘महापुरुष’, ‘पुजार सार्की’ र सर्वकालीन ब्लकबस्टर ‘पूर्ण बहादुरको सारङ्गी’ जस्ता हिट फिल्म गरेर आफ्नो करिअरलाई शिखरमा पुर्याइन्।
चरित्रमा आफूलाई ढाल्न सक्ने खुबी भएकी अञ्जना पछिल्लो समय रुचाइएकी छिन्। ‘पूर्ण बहादुरको सारङ्गी’मा उनले निर्वाह गरेको चरित्र बाटुली सशक्त चरित्र चित्रण हो, जसले छोराको भविष्यका लागि श्रीमानसँग लडाइँ लड्छिन्।
तर, उनै अञ्जनाले अभिनय गरेको फिल्म ‘डोरी’ भने सुपरफ्लप हुँदा उनको करीअरमै धक्का लाग्यो।
गएको शुक्रबारदेखि सोलो रिलिज हुने मौका भने ‘डोरी’ले पाएको थियो। सोलो फिल्म प्रदर्शनमा आउँदा पनि यति कमजोर सायदै अञ्जनाको पहिलो होला।
फिल्मले देशभर १२० देशभरका हलमा १२० शोज पाउँदा पनि दर्शक पाउन सकेन। यो फिल्मको बूकिङ र बिहानी शोजको अकुपेन्सी दयनीय अवस्थामा थियो। अहिलेसम्म त धेरै हलहरूबाट यो उत्रिसकेको छ। त्यतिमात्र हैन, धेरैले यो फिल्म आएको न गएकोसम्म पनि पत्ता पाएनन्।
अञ्जनाले पनि नयाँ टिमसँगको सहकार्यलाई विशेष अनुभवका रूपमा लिएको बताएका थिइन्। ‘नयाँ प्रोजेक्टमा काम गर्न पाउँदा सधैं रमाइलो लाग्छ। यसमा नयाँ आइडिया छ। यसले दर्शकलाई नयाँ अनुभूति दिनेछ। मुहूर्तपछि ऊर्जा र उत्साहले भरिएकी छु,’ फिल्म छायांकनमा जानुअघि उनले भनेकी थिइन्।
अरुण लामाले निर्देशन गरेको फिल्ममा अञ्जनासहित प्रवीण खतिवडा, शिशिर बाङ्देल, राज पौडेल, वीरेन्द्रसिंह कुशवाहा, विशाल राई, मिलन राई, कविता आले लगायतको अभिनय छ।
