काठमाडौं । काठमाडौं महानगरपालिकाका मेयर बालेन शाहले संघीय सरकारलाई एक साताभित्र प्रमुख प्रशासकीय अधिकृत पठाउन सामाजिक सञ्जाल मार्फत अल्टिमेटम दिएको आज एक साता पुरा भयो।
त्यसअघि गत २४ गते उनले सरकारको दम्भकै कारण प्रमुख प्रशासकीय अधिकृत नपठाएको र आफ्ना सफाई कर्मचारीले तीन महिनादेखि तलब नपाएको भन्दै एक हप्ताभित्र महानगरका कर्मचारीले तलब नपाए सबैलाई टुकुचामा लगेर गाड्नेसम्मको चेतावनी दिएका थिए।
तर, मेयर बालेनले चेतावनी दिएको एक साता बितेपनि संघीय सरकारले अहिलेसम्म आर्थिक अधिकार प्राप्त निमित्त प्रमुख प्रशासकीय अधिकृत पठाएको छैन। यो विषयमा संघीय सरकारले अहिलेसम्म कुनै पहल नै नगरेको मेयर बालेनका स्वकीय सचिव भूपदेव साहले बताए।
संघीय सरकारले प्रमुख प्रशासकीय अधिकृत बिदामा राखेर अर्को खोज्नुको कारण माग गरेकोमा त्यसको वृस्तित जवाफ पनि पठाइसकिएको उनको सचिवालयले जनाएको छ।
उता संघीय सरकारको सामान्य प्रशासन मन्त्रालयले मन्त्रीपरिषद्को निर्णय नभई प्रमुख प्रशासकीय अधिकृतको सरुवा नहुने भन्दै अहिलेका प्रमुख प्रशासकीय अधिकृत बिदामा रहेका कारण उनी हुँदाहुँदै अर्को प्रमुख प्रशासकीय अधिकृत पठाउन नमिल्ने जवाफ दिइसकेको छ।
मन्त्रालयका सूचना अधिकारी भूपेन्द्र सापकोटा भन्छन्, ‘अहिले प्रमुख प्रशासकीय अधिकृत बिदामा हुनुहुन्छ। उहाँ हुँदाहुँदै अर्को पठाउन मिल्दैन। त्यसमाथि अधिकृत पठाउन मन्त्रिपरिषदको निर्णय हुन आवश्यक छ। मन्त्रिपरिषदको निर्णय भएर अहिलेका प्रमुख प्रशासकीय अधिकृतको सरुवा हुन्छ। र त्यहाँ पठाउने निर्णय हुन्छ।’
