काठमाडौं । काठमाडौं महानगरपालिकाभित्र तनावको अवस्था बनेको छ । नेपाली कांग्रेस र नेकपा (एमाले)का वडाध्यक्षहरु र कर्मचारीहरु प्रमुख प्रशासकीय अधिकृत सरोज गुरागाईंलाई हाजिर गराउने तयारीस्वरुप जम्मा भएपछि मेयर बालेन्द्र साह ‘बालेन’ले महानगर प्रहरी परिचालन गरेका छन् । जुन घटनाबिच महानगरभित्र तनावको अवस्था सिर्जना भएको हो ।
अहिले महानगरभित्र जनप्रतिनिधि, कर्मचारी र नगर प्रहरीबीचमै विवादको अवस्था बनेको छ । जनप्रतिनिधि, कर्मचारी र नगर प्रहरी प्रशासकीय अधिकृतलाई जसरी पनि हाजिर गराउनु पर्ने बताइरहेका छन् भने महानगर प्रहरीले अवरोध गरिरहेको छ ।
काठमाडौं टावरको नक्सा पासमा अनियमितता गरेको भन्दै मेयर साहले अधिकृत गुरागाइँलाई अघोषितरुपमा निलम्बित गरेका थिए । उनलाई कार्यालय प्रवेशमा रोक लगाएका थिए ।
मेयर साहले गरागाईंको ठाउँमा अन्यलाई ल्याउन चाहेका थिए । तर, उनको चाहनामा संघीय सरकारले सहयोग गरेन । उनै गुरागाईंलाई निरन्तरता दिएपछि मेयर साह आक्रोशित छन् ।
यो विवादका बिच झण्डै ५ महिनादेखि जनप्रतिनिधि तथा कर्मचारीहरुले तलब पाएका छैनन् । महानगरका थुप्रै गतिविधि प्रभावित बनेको छ ।
