काठमाडौं । अघिपछि काठमाडौं महानगरपालिकाका मेयर बालेन साहलाई साथ दिँदै आएकी उपमेयर सुनिता डंगोल आज रुष्ट देखिइन्। प्रमुख प्रशासकीय अधिकृत विवादमा बालेनले कोठामा बसेर निर्देशन दिएको भन्दै समाधान खोज्न सुझाइन्।
बिहीबार प्रमुख प्रशासकीय अधिकृत सरोज गुरागाईं साढे तीन महिनापछि हाजिर गर्न महानगरस्थित कार्यकक्ष पुगेका थिए।
संघीय मामिला तथा सामान्य प्रशासन मन्त्रालयले गुरागाईँलाई काठमाडौं महानगरपालिकामै हाजिर गर्ने वातावरण बनाइदिनु भन्दै एक महिना अघि पत्र पठाएको थियो। मन्त्रालयको पत्रपछि गुरागाईँ बिहीबार महानगरपालिका पुगेका हुन्।
गुरागाईं कार्यालय पुग्दा उपप्रमुख सुनिता डंगोल, अधिकांश कार्यपालिका सदस्य, वडाध्यक्षहरू र कर्मचारीले स्वागत गरेका थिए। गुरागाईंलाई अवरोध गर्न बालेनले नगर प्रहरी परिचालन गरे पनि अवरोध छिचोल्दै गुरागाईं कार्यालय प्रवेश गरेका हुन्।
नगर प्रहरीले रोक्न खोजेपछि कर्मचारीले गुरागाईंको कार्यकक्ष प्रवेशद्वारमा तोडफोड पनि गरेका थिए। लगत्तै अहिले उपमेयर सुनिता डंगोलसहितको बैठक बसेको छ।
त्यस बैठकमा उपप्रमुख डंगोलले बालेनको चर्को आलोचना गरिन्। उनले हरेक घटनाक्रमबारे आफूहरू जानकार रहेको भन्दै बालेनलाई कोठामा बसेर निर्देशन नदिन चेतावनी दिएकी हुन्।
‘यो तमासा हामीले हेर्नुपर्ने ? मेयरको आदेश हो भने मेयर अघि आउनुपर्छ। होइन भने कोठामा बसेर आदेश दिन पाइँदैन। पहिला आजको विषय समाधान गर्छौ। त्यसपछि बोर्ड बैठक बस्छौँ। आजका लागि यो समस्या समाधान गर्नुपर्छ’, डंगोलले भनिन्।
उनले अगाडी थपिन्, ‘मन्त्रालयबाट पठाएपछि प्रमुख प्रशासकीय अधिकृत हाजिर गर्न आउनु भएको छ। उहाँ हाजिर गर्न आउँदा झडपको अवस्था हुनु राम्रो होइन। कर्मचारी–कर्मचारीबिच लडाइँ हुनु पनि राम्रो होइन।’
उपप्रमुख डंगोलले प्रमुख प्रशासकीय अधिकृत दोषी प्रमाणित भएको अवस्थामा कारबाही गर्न तयार रहेको पनि बताइन्।
‘त्यसैले उहाँलाई हाजिर गर्ने व्यवस्था गर्नुपर्छ। हजारौँ कर्मचारी र लाखौँ काठमाडौंवासीले दुःख पाएका छन्। क्यान्सर पीडितलाई पनि हामीले पैसा दिन सकेका छैनौँ। अझै छानबिन गर्नुपर्ने भए गर्ने हो। तर, यो पीडामा राख्नु हुँदैन।’
