काठमाडौं । सञ्चार तथा सूचना प्रविधिमन्त्री पृथ्वीसुब्बा गुरुङले नेपाल राष्ट्र बैंकले चाँडै नयाँ गभर्नर पाउने बताएका छन्।
मंगलबार मन्त्रीपरिषद्का बैठक सुनाउने क्रममा सञ्चारकर्मीहरुलाई जवाफ दिँदै सरकारका प्रवक्तासमेत रहेका गुरुङले छिटो भन्दा छिटो राष्ट्र बैंकले गभर्नर पाउने बताए।
प्रवक्ता गुरुङले गभर्नर नियुक्तिका लागि सरकारले समयमै उपप्रधानमन्त्री एवं अर्थमन्त्री विष्णु पौडेलको संयोजकत्वमा सिफारिस समिति गठन गरेको र अहिले त्यो कमिटीले काम गरिरहेको बताए।
‘गभर्नरको नियुक्तिमा दुई वटा पार्टीको बीचमा भागबण्डा नमिलेर ढिलो भएको भन्नेकुरा सत्य होइन,’ उनले भने, ‘डेपुटी गभर्नर निलम ढुंगानालाई सरकारले कार्यवाहक गभर्नर तोकिसकेकाले काम पनि रोकिंदैन।’
मन्त्री गुरुङले अहिले देखिएको बेथिति सरकारले अन्त्य गर्ने जिकिर गरे। ‘गभर्नरले मात्रै हुने भन्ने त होइन, तर गभर्नरको भूमिका महत्वपूर्ण हुन्छ,’ उनले भने ।
