मुम्बई– भारतीय अभिनेता सुशान्त सिंह राजपुतको निधनसँगै नातावादको विषयलाई लिएर बलिउडमा निकै बहस चलेको छ। यसैबीच सुशान्तको मृत्युण्बारे फिल्म बन्ने भएको छ ।
सुशान्तको जीवन र मृत्युको घट्नाक्रमलाई लिएर घोषणा भएको चलचित्र ‘सुसाइड और मर्डर’को पोष्टर सार्वजनिक भएको छ । चलचित्र विएसजी बिन्जको निर्माणमा बन्न लागेको हो भने यसको निर्माताका रुपमा विजय शेखर गुप्ता छन् ।
समिक मौलिकले निर्देशन गर्ने चलचित्रलाई सुशान्त सिंहले वलिउडमा प्रवेश गर्दा गरेको संघर्ष र उनको जीवनलाई लिएर बनाउन लागिएको हो ।
चलचित्रका निर्माता रहेका विजय शेखर गुप्ताले केही दिनअघि इन्स्टाग्राममा चलचित्रको एक पोष्टर राखेका थिए । त्यस्तै, सोही पोष्टरलाई अहिले चलचित्रको प्रोडक्सन कम्पनी वीएसजी बिन्जले आफ्नो ट्विटरमार्फत् सार्वजनिक गरेको छ ।
चलचित्रको एक पोष्टरमार्फत् सुशान्तको भूमिकामा सचिन तिवारीलाई राखिएको बताइएको छ भने अर्को पोष्टरमार्फत् चलचित्रमा ‘नेपोकिङ’को भूमिकामा भारतीय मोडल राणालाई राखिएको छ ।
गत जुन १४ मा आफ्नै घरमा फासी लगाएर आत्महत्या गरेका सुशान्तको जीवनमा आधारित भएको चलचित्र बन्न लागेको हो । उक्त चलचित्र आगामी सेप्टेम्बरबाट छायांकनमा जाने विभिन्न भारतीय सञ्चारमाध्यमले उल्लेख गरेका छन् ।
– एजेन्सी
