काठमाडौं–दैनिक रूपमा सुनको मूल्यले नयाँ रेकर्ड कायम राखेको छ । एकलाख नजिक पुगेको सुनको मूल्य अझै बढ्न सक्ने सुनचाँदी व्यवसायीहरूले बताएका छन् । सुनको मूल्य बढेपछि व्यवसायीहरुलाई सुन विक्री गर्नुभन्दा व्यवसाय नै टिकाउन समस्या परेको नेपाल राष्ट्रिय सुनचाँदी व्यवसायी मञ्चका अध्यक्ष गणेशप्रसाद लकान्द्रीले बताए ।
सुनको मूल्य बढ्दा उपभोक्तालाई मात्र नभई व्यवसायीहरू पनि घाटामा रहेको अध्यक्ष लकान्द्रीले बताए । उनी भन्छन्, ‘दिनमा एकतोला सुन पनि बिक्री हुन सकेको छैन । उपभोक्ता मात्र होइन हामी व्यवसायीहरूले पनि घाटा व्यहोरेका छौं ।’
कोभिड–१९ मात्र नभई विश्वका उद्योग तथा कलकारखाना बन्द भएपछि सुनको मूल्य बढेको उनको भनाइ छ । सुनको मूल्य बढेर १ लाख ४० हजारसम्म पुग्नसक्ने अनुमान गर्दै लकान्द्रीले यस्तो अवस्था आए व्यवसायीहरूले पसल बन्द गर्नुको विकल्प नहुने बताए ।
