काठमाडौं- रूपन्देही जिल्लामा आज भएका दुई फरक फरक घटनामा दुई जनाको ज्यान गएको छ। सैनामैना नगरपालिकामा भएका घटनामा उनीहरुको ज्यान गएको जिल्ला प्रहरी कार्यालयले जनाएको छ।
सैनामैना-९ बनरहामा करेन्ट लागेर एक पुरुषको मृत्यु भएको छ। करेसाबारीमा पानी लगाउन विद्युतीय मोटर चलाउने क्रममा तारमा छोइँदा ४० वर्षीय भीमबहादुर नेपालीको मृत्यु भएको प्रहरीले जनाएको छ।
करेन्ट लागेर घाइते भएका नेपालीको उपचारका लागि लुम्बिनी प्रादेशिक अस्पताल बुटवल ल्याउँदै गर्दा बाटामा मृत्यु भएको थियो।
आजै पूर्वपश्चिम राजमार्गअन्तर्गत सैनामैना-५ बुद्धनगरमा पूर्वबाट पश्चिमतर्फ जाँदै गरेको ना ६ ख ५७०२ नम्बरको ट्रकको ठक्करबाट एक युवकको मृत्यु भएको प्रहरीले जनाएको छ।
ट्रकले ठक्कर दिँदा घाइते भएका सैनामैना-६ कलौनीका १६ वर्षीय विनोद विकको प्रादेशिक अस्पतालमा उपचारका क्रममा मृत्यु भएको हो।
