जापान- जापानको नयाँ प्रधानमन्त्रीका लागि मन्त्रिपरिषद्का मुख्य सचिव योशिहिड सुगाले पनि आकांक्षा देखाएका छन्।
तत्कालीन प्रधानमन्त्री सिन्जे आवेले अस्वस्थताको कारण देखाउँदै प्रधानमन्त्री पदबाट गत शुक्रबार राजीनामा दिएकाले जापानमा अहिले प्रधानमन्त्री पद खाली रहेको छ।
आकांक्षी सुगा सरकारको प्रमुख प्रवक्तासमेत हुन्। उनलाई पार्टीकै कतिपय वरिष्ठ नेताहरुले प्रधानमन्त्री बन्न उपयुक्त पात्रको रुपमा अगाडि सारेका छन्।
उनीहरुले कोरोनाभाइरसले सिर्जना गरेको महामारीको सामना गर्ने, सबैसँग समन्वय र सहकार्य गर्नेलगायतका सरकार सञ्चालनका लागि आवश्यक क्षमता उनीसँग भएको दाबी पनि गरेका छन्।
सत्तारुढ दल लिबरल डेमोक्र्याटिक पार्टी (एलडीपी)का वरिष्ठ सांसदहरुले नयाँ प्रधानमन्त्री चयनका लागि आउदो सेप्टेम्बर १५ तारिखको वरिपरि निर्वाचन हुनसक्ने बताएका छन्।
प्रधानमन्त्री छनोटको निर्वाचनमा एलडीपीकै नेताद्वय पूर्व परराष्ट्र मन्त्री फुमिओ किशिदा र पूर्व रक्षा मन्त्री शिगेरु आइशीबा पनि सहभागी हुने संकेत गरेको जनाइएको छ।
मुख्य सचिव सुगाले सन् २०१२ देखि नै तत्कालीन प्रधानमन्त्री आवे शक्तिमा आएसँगै सरकारको मुख्य प्रवक्ताको रुपमा काम गर्दै आएका छन्।
उनलाई आवेको अति विश्वासपात्र भएकाले र क्षमतावान् पनि भएकाले प्रधानमन्त्री हुने सबैभन्दा बढी सम्भावना भएको उम्मेदवारको रुपमा हेरिएको छ। आवेको चाहना र समर्थन पनि उनलाई नै हुनसक्ने धेरैले अनुमान गरेका छन्।
निर्वतमान प्रधानमन्त्री आवेले आफू अस्वस्थ्य हुँदा हुँदै पदमा बसिरहनु उपयुक्त नहुने ठानेर राजीनामा दिएको बताएका थिए।
आफ्नो स्वास्थ्य समस्या देशको समस्या बन्न नहुने र देश विकासको गतिमा बाधक बन्न नहुने उनको भनाइ छ। उनको कार्यकाल आगामी सन् २०२१ को सेप्टेम्बरसम्म भएपनि उहाँले अहिले नै राजीनामा दिएका हुन्।
सन् २०१२ देखि लगातार शक्तिमा रहेका आवे यसअघि नै जापानमा सबैभन्दा लामो समय प्रधानमन्त्री भएको नेताका रूपमा इतिहास रच्न सफल बनेका छन्। उनले यसअघि सन् २००७ मा पनि स्वास्थ्य समस्याकै कारणले प्रधानमन्त्री पदबाट राजीनामा दिएका थिए। तर पछि स्वास्थ्यमा सुधार भएपछि फेरि निर्वाचित भए।
पछिल्लो दुई हप्तामा उनी दुईपटक अस्पताल पुगिसकेका छन्। उनी अर्को महिनादेखि ६६ वर्ष लाग्नेछन्।
