महोत्तरी– कोभिड–१९ सङ्क्रमण फैलदै जाँदा जिल्ला प्रशासन कार्यालय महोत्तरीले तेस्रोपटक निषेधाज्ञा जारी गरेको छ। १० भदौमा दोस्रोपटक जारी गरिएको निषेधाज्ञाको अवधि सोमबार मध्यरातमा सकिएपछि जिल्ला प्रशासन कार्यालय महोत्तरीले थप एक साता अवधिका लागि यो आदेश जारी गरेको हो।
सोमबार थपिएको निषेधाज्ञाको अवधि २२ भदौसम्म कायम रहने प्रमुख जिल्ला अधिकारी कृष्णबहादुर कटुवालले जारी गरेको आदेशमा उल्लेख छ। जिल्ला प्रशासन कार्यालयले जिल्लाभरि लागू हुनेगरी १–१० भदौसम्मका लागि निषेधाज्ञा घोषणा गरेको थियो। यद्यपि त्यसअघि पनि साउन २१ गते नै जिल्ला सदरमुकाम जलेश्वर नगरपालिकाको मुख्य बजारक्षेत्र र महोत्तरी गाउँपालिका-३, र ५ मा निषेधाज्ञा जारी थियो।
हेलचक्र्याइँ गर्दा कोरोनामा बढोत्तरी
भदौ लागेपछि जिल्लाभरि जारी गरिएको निषेधाज्ञाबीच नै यहाँ सङ्क्रमण ह्वात्तै बढेको छ। जिल्लामा कोरोना भाइरसबाट मृत्यु भएका कूल १० मध्ये आठको मृत्यु भदौ लागेपछि भएको हो। तीमध्ये दुई जनाको मृत्यु सोमबार (१५ भदौ) भएको प्रदेश नं २ स्वास्थ्य निर्देशनालय जनकपुरधामले जनाएको छ।
जिल्लामा सोमबार साँझसम्म १ सय १९ महिला र एक हजार १ सय २४ पुरुषसहित एक हजार २ सय ४३ जनामा सङ्क्रमण पुष्टि भएको छ। तीमध्ये सात जनामा सोमबार नै पुष्टि भएको निर्देशनालयका वरिष्ठ स्वास्थ्य प्रशासक विजयकुमार झाले जानकारी दिए। भदौ लागेयताका १५ दिनमा जिल्लामा २ सय ३४ नयाँ सङ्क्रमित थपिएका छन्।
जिल्लामा लगातार निषेधाज्ञा थपिँदै गए पनि यसको अनुगमन भने नभएको गुनासो बढेको छ। साना सवारी साधन-साइकल, मोटरसाइकल, जिप, टेम्पु रुपमा निर्वाध सञ्चालन हुुनु र जताततै भीडभाड बढे पनि त्यसको निगरानीमा प्रहरी, प्रशासन र स्थानीय तहको नेतृत्व उदासीन देखिएको स्थानीयको गुनासो छ।
सप्तरीमा पनि निषेधाज्ञा
कोरोना सङ्क्रमणको विस्तारलाई रोकथाम र नियन्त्रण गर्न सप्तरीको तीन स्थानीय तहमा थप सात दिन निषेधाज्ञालाई निरन्तरता दिने निर्णय भएको छ। कोरोनाको सङ्क्रमण बढी देखिएको राजविराज नगरपालिका, हनुमाननगर कङ्कालिनी नगरपालिका र तिलाठी कोइलाडी गाउँपालिकामा आगामी भदौ २२ गतेसम्म निषेधाज्ञालाई निरन्तरता दिइने सोमबार निर्णय भएको छ।
सप्तरीका प्रमुख जिल्ला अधिकारी शङ्करहरि आचार्यले सोमबार जारी गरेको सूचनामा स्थानीय प्रशासन ऐन, २०२८ को दफा ६ ९३० र सङ्क्रामक रोग ऐन, २०२० को दफा २ बमोजिम तीन स्थानीय तहमा अनावश्यक हिँडडुल, आवतजावत नगर्न, नगराउन जिल्ला सुरक्षा समितिले निषेधाज्ञालाई निरन्तरता दिने निर्णय गरेको जनाइएको छ।
सङ्घीय सांसद, प्रदेशसभा सदस्य, राजनीतिक दलका प्रतिनिधिको उपस्थितिमा सोमबार बसेको जिल्लास्तरीय सङ्कट व्यवस्थापन केन्द्रको सिफारिसका आधारमा लगत्तै बसेको जिल्ला सुरक्षा समितिको बैठकले सो निर्णय गरेको जिल्ला प्रशासन कार्यालय सप्तरीका प्रशासकीय अधिकृत एवं सूचना अधिकारी आनन्दकुमार ठाकुरले बताए।
सप्तरी जिल्लाभरि साउन २० गतेदेखि जारी गरिएको निषेधाज्ञा गए मध्यराति सकिन लागेको बेला बैठकले निषेधाज्ञाको क्षेत्र कम गर्दै तीन स्थानीय तहमा भने जारी राख्ने निर्णय गरेको हो। उक्त क्षेत्रमा अत्यावश्यक सेवा अन्तर्गतका खाद्यान्न, तरकारी र फलफूलका पसल बिहान ५ बजेदेखि बिहान १० बजेसम्म मात्र खोल्न पाइने छ।
अन्य स्थानीय तहमा अत्यावश्यक सेवाअन्र्तगत पर्ने सवारी साधन मात्र सञ्चालन गर्न पाइने छ। नेपाल सरकारले सञ्चालन गर्न रोक लगाएको बाहेकका पसल, सेवा र व्यवसाय स्वास्थ्य सतर्कता अपनाएर मात्र सञ्चालन गर्न पाइए पनि साप्ताहिक हाटबजार सञ्चालन गर्न नपाइने निर्णय भएको बैठकमा सहभागी नेकपाका प्रदेश सदस्य सुखराम यादवले बताए।
