काठमाडौं- ललितपुरमा ट्राफिक प्रहरीका जवानमाथि निर्घात कुटपिट गरेका अभियोगमा ९ जना पक्राउ परेका छन्।
पुल्चोकमा रातो मत्स्येन्द्रनाथको रथ तान्ने क्रममा आज दिउँसो भएको झडपपछि युवाको समूहले ट्राफिक प्रहरी जवान कमलप्रसाद घिमिरेमाथि निर्घात कुटपिट गरेको थियो।
त्यसमा संलग्न रहेको देखिएका व्यक्तिहरुलाई पक्राउ गरिएको ललितपुर प्रहरी प्रमुख एसएसपी टेकप्रसाद राईले जानकारी दिए।
महानगरीय प्रहरी परिसर ललितपुरका प्रवक्ता डिएसपी सन्तोष तामाङले पक्राउ परेकाहरुलाई कुन मुद्दा चलाउने भन्नेबारे छलफल भइरहेको जानकारी सूत्र न्यूजलाई दिए।
पक्राउ परेका व्यक्तिलाई अहिले क्वारेन्टिनमा राखिएको छ । उनीहरुको पिसीआर जाँच गरेर कानुनी कारबाही अघि बढाइएने एसएसपी राईले जानकारी दिए।
पक्राउ परेका व्यक्तिविरुद्ध अभद्र व्यवहारको कसूरअन्तर्गत मुद्दा चलाउने तयारी गरिएको उनको भनाइ छ।
यी हुन् पक्राउ पर्नेहरू
१. लपु मनपा वडा १६ गावाहाल, बर्ष ४० को महेश बज्राचार्य
२. ऐ वडा ११ बंगलामुखी, बर्ष ३९को पृथ बिन्दु महर्जन
३. ऐ वडा २१ बस्ने बर्ष ३८ को अशोज कुमार महर्जन
४. ऐ वडा ६ बस्ने बर्ष ३६ को रवि शाक्य
५. ऐ वडा १६ बस्ने बर्ष ४० को रविन शाक्य
६. महालक्ष्मी नपा वडा १ इमाडोल बस्ने बर्ष ४३ को सुविन शाक्य
७. ऐ इमाडोल को ध्रुवराज बज्राचार्य,
बर्ष ४७
८. भक्तपुर ठिमी-८, बर्ष ३२ को श्याम श्रेष्ठ
९. का. जि. कामनपा वडा १६ बस्ने बर्ष ४० को यादवलाल कायस्थ
