काठमाडौं- बिहीबार ललितपुरस्थित पुल्चोकमा मत्स्येनारायणको रथ तान्ने क्रममा भएको स्थानीय र प्रहरीको झडपमा प्रेसको ज्याकेट लगाएर प्रहरीलाई ढुंगा हानिरहेको भिडियो क्लिप अहिले सामाजिक संजालमा भाइरल भइरहेको छ ।
भिडियोमा एक युवकले प्रेस लेखिएको ज्याकेट लगाएका छन्, काँधमा क्यामेरा बोकेका छन् अनि ढुंगा टिपेर प्रहरीतर्फ हानिरहेका छन् ।
पत्रकारको अवतारमा यस्तो काम गरेको भन्दै सोसियल मिडियामा ती युवकको चर्को आलोचना भएपछि प्रहरीले उनको खोजी सुरु गरेको थियो । महाशाखाका प्रमुख एसएसपी दीपक थापाका अनुसार ती ढुंगा हान्ने युवक ललितपुरको महालक्ष्मी नगरपालिका–१ का २१ वर्षीय अनिश महर्जन रहेको र प्रहरीले उनलाई पक्राउ गरिसकेको छ ।
‘उनी कुनै पनि संञ्चारमाध्ययममा आबद्ध नभएको पाइयो,’ एसएसपी थापाले सूत्रन्यूजलाई भने । थापाका अनुसार महर्जनलाई महाशाखाको टोलीले पक्राउ गरेर ललितपुर प्रहरीको जिम्मा लगाएको छ ।
