झापा– झापाको झिलझिलेस्थित एक किलोमिटर उत्तर रतुवामाई वृक्षारोपण आयोजनाको जंगलमा मृत अवस्थामा फेला परेका गोमनसिंह मगरको हत्या अभियोगमा प्रहरीले एक जनालाई पक्राउ गरेको छ ।
शिवसताक्षी नगरपालिकाका २९ वर्षीय मगरको हत्या अभियोगमा प्रहरीले उनकै साथी मनकुमार लिम्बूलाई पक्राउ गरेको हो । शव भेटिए लगत्तै प्रहरीले लिम्बूलाई पक्राउ गरेर इलाका प्रहरी कार्यलय झिलझिलेमा राखेको थियो । प्रहरीसँगको बयानमा हत्या स्वीकारेको अनुसन्धानमा संलग्न एक प्रहरीले जानकारी दिए ।
मंगलबार साँझदेखि घरबाट हराएका २९ वर्षीय मगरको बुधबार विहान १० बजेतिर जंगलमा शव भेटिएको थियो । एक प्रहरी अधिकृत अनुसार लिम्बुले नयाँ नम्बरबाट फोन गर्दै गोमनसिंहले मंगलबार साँझ झिलझिले बजारमा भेट्न बोलाएका थिए । त्यसपछि साँझ ६ बजे प्रदेश ०१–०१–०१२ प ५२२५ नम्बरको रातो रङको पल्सर मोटरसाइकलमा उनी घरबाट निस्किएका थिए । त्यहाँबाट दुइजना मोटरसाइकल चढेर एक किलोमिटर उत्तर जंगलतर्फ गएको र त्यसपछि लिम्बुले मगरको घाँटीमा छुरा रेटेर हत्या गरेको प्रहरी अनुसन्धानमा खुलेको छ ।
प्रहरीले शव भेटिएको करिब १ सय मिटर उत्तरबाट गोमनको मोटरसाइकल, पानीमा फ्याँकेको अवस्थामा छुरासमेत फेला पारिसकेको छ ।
प्रहरी श्रोतका अनुसार अनुसन्धानबाट लिम्बु र मगर दुवै बहराइनबाट फर्किएका र आर्थिक लेनदेनको विवाद नै हत्याको कारण देखिएको छ । झापा प्रहरी शनिबार घटनाको विस्तृत जानकारी प्रेसमिट गरेर दिने तयारीमा छ ।
