काठमाडौं- विश्वभरि फैलिएको कोभिड–१९ का कारण उत्पन्न विषम परिस्थितिमा बहराइनका लागि नेपाली राजदूतावासले नेपाल फर्कन चाहने १ सय ४६ जना नेपालीलाई विमान चार्टर गरेर बिहीबार नेपाल ल्याएको छ।
कम्पनी बन्द भएर र श्रम सम्झौता सकिएर नेपाल फर्किने इच्छुक कामदारलाई स्वदेश फर्काइएको हो।
राजदूतावासले बिदामा बहराइनबाट नेपाल आएपश्चात् फैलिएको कोरोना भाइरसका कारण अन्तर्राष्ट्रिय उडान स्थगित भई नेपालमै रोकिएर पुनः रोजगारीमा बहाल हुन बहराइन जान इच्छुक १ सय ४५ जना नेपालीलाई पहिलो पटक बहराइन फर्काएको राजदूत पदम सुन्दासले जानकारी दिए। ‘हाम्रो साथ आमाको काख’ अभियानको सहयोगमा उनीहरु बहराइन फर्किएका हुन् ।
बहराइनका लागि नेपाली राजदूतावासले गत हप्ता अन्तर्राष्ट्रिय उडान स्थगित भई नेपालमै रोकिएर पुनः रोजगारीमा बहाल हुन बहराइन जान इच्छुक २ सय ७४ नेपालीको नामावली सार्वजनिक गरेको थियो। राजदूत सुन्दासले भने, ‘कोरोना सुरु भएपछि सानो लगानीका होटल, रेस्टुरेन्टहरु बन्द भए, करीब एक हजार ३ सय नेपालीले रोजगारी गुमाएका छन्, हामीले समस्यामा परेकालाई अप्रिल महिनामै नेपाल जान चाहनेलाई पठाएका थियौं।’
छुट्टीमा नेपाल फर्किएका ९ सय २७ जनामध्ये १ सय ४५ पुनः रोजगारीमै बहराइन फर्किएका छन्। नेपाल फर्किन चाहने ३०० नेपालीमध्ये गत बिहीबार १ सय ४६ फर्किएका हुन्। बाँकी नेपाल फर्किन इच्छुक र नेपालबाट पुनः रोजगारीमा बहराइन फर्किन इच्छुकलाई विमान चार्टर गरेरै नेपाल ल्याउने र बहराइन जान चाहनेलाई लैजाने योजना रहेको राजदूत सुन्दासको भनाइ छ।
उनले भने, ‘अझै धेरै नेपाल जाने तयारीमा छन्। छिट्टै पठाउँछौं। त्यहाँ कोही पनि नेपाली भोकै भएर दुःख पाएर बस्नु परेको छैन। दूतावासको सम्पर्कमा आएकालाई उद्धार राहत तथा खानबस्नको व्यवस्था गरेका छौं।’
