काठमाडौं- भारतमा अभिनेत्री कंगना रणावत र शिव सेना बीचको विवाद चर्किरहेको छ।
कंगनाले शिव सेनाका प्रमुख उद्धव ठाकरेलाई एक भिडियो सन्देशमा अपमान गरेको भन्दै समाजिक सञ्जालमा यो विवाद चुलिएको थियो। केही दिनअघि बिएमसीले कंगनाको कार्यालयमा डोजर चलाएपछि यो विवाद झन् चर्किएको छ।
स्मरण नै होला, अभिनेता सुशान्त सिंह राजपुतको निधनपछि कंगनाले बलिउडमा नातावाद हाबी भएको, बलिउड माफियाले असली ट्यालेन्टलाई मार्ने जस्ता कुरा निरन्तर गरिरहेकी छन्।
यसैबीच भारतमा कंगना प्रस्तुत भएको शैलीसँग नेपाललाई जोडेर नेपालका हास्यकलाकार तथा चलचित्र निर्माता दिपक राज गिरीले एक टिप्पणी गरेका छन्। दीपकले सामाजिक सञ्जाल फेसबुकमा एक स्टाटस राख्दै उनले नेपालमा ‘पोथी बास्नु हुँदैन’ भन्ने सोच रहेकाले आफूहरु सुरक्षित रहेको भन्दै व्यंग्य गरेका हुन्।
‘भारतमा एक अभिमेत्री (कंगना रणावत)ले सारा सिनेक्षेत्रका हस्तीहरु तथा राजनीतिक क्षेत्रका हस्तीहरुको निद्रा हराम गरेकी छन्’, दीपकले लेखेका छन्, ‘धन्न यहाँ ‘पोथी बास्नु हुँदैन’ भन्ने सोचले गर्दा हामीहरु सुरक्षित छौं।’
