नयाँ दिल्ली- भारतमा कोरोनाभाइरसबाट सङ्क्रमित भएकाहरुको दैनिक संख्या दिनप्रतिदिन वृद्धि हुँदै गइरहेको छ। पछिल्लो २४ घण्टामा अहिलेसम्मकै सबैभन्दा धेरै ९७ हजार ५ सय ७० जना सङ्क्रमित भएको अधिकारीहरुले शनिबार जानकारी दिएका छन्।
योसँगै भारतमा कोरोनाभाइरसबाट अहिलेसम्म कुल सङ्क्रमितहरुको संख्या ४६ लाखभन्दा बढी पुगेको देखिएको छ। संघीय (केन्द्रीय) स्वास्थ्य मन्त्रालयले दिएको जानकारी अनुसार भारतमा कोरोनाकै कारण मृत्यु भएकाहरुको कुल सङ्या अहिलेसम्म ७७ हजार ४ सय ७२ पुगेको छ।
कुल मृतकमध्ये एक हजार २ सय १ जनाको पछिल्लो २४ घण्टामा मृत्यु भएको पनि मन्त्रालयले शनिबार जनाएको छ।
भारतमा कोरोनाका कारण अहिलेसम्म कुल ४६ लाख ५९ हजार ९ सय ८५ जना सङ्क्रमित भएको अधिकारीहरुले जनाएका छन्। ती मध्ये ३६ लाख २४ हजार १ सय ९७ जना सङ्क्रमणमुक्त भइसकेका छन्।
अधिकारीहरूका अनुसार अरु नौ लाख ५८ हजार ३ सय १६ जना अझै पनि सङ्क्रमित अवस्थामै रहेका छन्। भारतमा सबैभन्दा बढी महाराष्ट्र प्रदेश प्रभावित भएको छ। महाराष्ट्रमा मात्रै अहिलेसम्म कोरोनाकै कारणले २८ हजार जनाको मृत्यु भएको छ।
महाराष्ट्रमा अहिले पनि दुई लाख ६१ हजार ७ सय ९८ जना सक्रिय सङ्क्रमित अवस्थामै रहेको अधिकारीहरुले जानकारी दिएका छन्।
त्यसैगरी आन्द्र प्रदेश दोस्रो धेरै प्रभावित प्रदेशमा पर्दछ। जहाँ अहिलेपनि ९७ हजार ३ सय ३८ जना सक्रिय सङ्क्रमितहरु रहेका छन् भने चार हजार ७ सय २ जनाको कोरोनाकै कारण मृत्यु भएको छ।
कुल ४८ हजार ४ सय ८२ जना सक्रिय सङ्क्रमितहरु रहेको तमिल नाडु भारतको तेस्रो धेरै प्रभावित प्रदेशमा पर्दछ। नमिल नाडुमा मात्रै कोरोनाका कारण अहिलेसम्म आठ हजार १ सय ५४ जनाको मृत्यु भएको छ।
त्यसपछि धेरै प्रभावित प्रदेशहरुमा कर्नाटक र दिल्ली प्रदेश रहेको केन्द्रीय स्वास्थ्य तथा परिवार कल्याण मन्त्रालयले जनाएको छ। रासस
