काठमाडौं– प्रदेश ५ का मुख्यमन्त्री शंकर पोखरेलले अस्थायी राजधानी तोक्ने तत्कालीन प्रधानमन्त्री शेरबहादुर देउवाले नै बुटवल अन्तिम राजधानी नभएको बताएको दाबी गरेका छन्। प्रदेशसभामा प्रदेश राजधानीको नाम र स्थायी राजधानीको विषयमा मंगलबार जवाफ दिने क्रममा मुख्यमन्त्री पोखरेलले कहीँ कतै सभापति देउवाले बुटवल अन्तिम राजधानी नभनेको दाबी गरेका हुन्।
‘बुटवल अस्थायी राजधानी हो स्थायी राजधानी तोक्ने अधिकार त प्रदेश सरकारलाई नै छ,’ देउवाले बुटवल आउँदा या त्यस क्षेत्रका विभिन्न कार्यक्रममा भनेको दाबी गर्दै मुख्यमन्त्रीले भने। उनले देउवाले उक्त भनाइ पटक–पटक भनेको र आफूसँग रेकर्ड सुरक्षित रहेको पनि बताए।
‘नेपाली कांग्रेसका नेता शेरबहादुर देउवाले प्रदेशको अस्थायी राजधानी तोक्ने काम गर्नुभयो। त्यसपछि प्रदेश ५ का जिल्ला आउँदा उहाँले हरेक सभामा भनेका भनाइ मलाई सम्झना छ,’ उनले भने, ‘उहाँले अस्थायी राजधानी न तोकेको हो। स्थायी तोक्ने अधिकार प्रदेशसभामा छ भन्नुभएको थियो, रेकर्ड सुरक्षित छ।’
उनले प्रदेशको राजधानी कहाँ बनाउने नभई प्रदेश कस्तो बनाउने भनेर सोच्न उनले सबैलाई आग्रह पनि गरे। देउवाले बुटवललाई वैज्ञानिक हिसाबले सही छ भनेर नभनेको पनि दाबी गरे। ‘त्यसबेला उहाँले के भन्नु भएन भने वैज्ञानिक ढंगले हामीले राजधानी टुंगो लगाएका छौं यो नै अन्तिम हो भनेर कहीँ भन्नुभएको छैन,’ मुख्यमन्त्री पोखरेलले भने।
