काठमाडौं- लोपोन्मुख चेपाङ समुदाय दसैं मनाउने चिन्तामा छ। बेँसीसहर नगरपालिका–११ चिती बरबोटको चेपाङ समुदायलाई दसैं भित्रिसके पनि आम्दानीको कुनै स्रोत नभएकाले अर्थाभावमा दसैंका बेला खाने चामल समेत छैन।
दश घर रहेको बरबोटका चेपाङलाई विगतमा वर्षेनी सहयोग आउने गरेको र त्यसकै भरमा दसैं मनाउँदै आए पनि यस वर्ष दसैंको चौथो दिनसम्म पनि कहीँकतैबाट केही सहयोग नआउँदा चेपाङ समुदायलाई सताउन थालेको नेपाल चेपाङ संघ लमजुङ शाखाका पूर्वअध्यक्ष अमृता चेपाङले बताए। उनले भने, ‘विगतमा जस्तो दसैं यस वर्ष कोभिड १९ का कारण नमनाए पनि खानाका लागि यहाँका अधिकांश चेपाङलाई दसैंमा चामलसमेत किन्ने पैसा छैन।’
दसैंमा मीठोमसिनो खाएर हर्षोमङ्खका साथ मनाउनका लागि आर्थिक अभावका कारण अरुको भर पर्नुपर्दा र सहयोग अहिलेसम्म नआउँदा बालबच्चालाई नयाँ कपडा लाउन र एक छाक खानलाई समस्या भएको ५७ वर्षीय पूर्णबहादुर चेपाङले भने।
तिनलाई गरी खानलाई खुर्सानी लगाउनेसमेत आफ्नो जमीन छैन। गाउँमा रहेका अन्य समुदायको जमीनमा अधियाँ गरेर खेती गर्नुपर्छ। वर्षभरि गरिएको खेतीबाट उब्जेको अन्नबाली आधीआधी गर्दा दुई महिनाबाहेक खान नपुग्ने उनको भनाइ छ। ४७ वर्षीय तिलकबहादुर चेपाङले भने, ‘गरीबलाई के दसैं के चाडपर्व, सधैं एकनाश भएको छ। जब/जब चाडपर्वको बेला आउँछ अरुले नयाँ नयाँ लगाएको देख्दा हाम्रा छोराछोरीले हामीलाई पनि त्यस्तै कपडा ल्याइदिनुस् न बुबा भन्ने गर्छन्। त्यतिबेला मलाई निकै नरमाइलो लाग्छ, अनि मन साह्रै रुन्छ।’
गत वर्ष तिनलाई सहयोग गरिए पनि यस वर्ष केही जानकारी नगराइएकाले दिन नसकिने बेंसीशहर नगरपालिकाका प्रमुख गुमानसिंह अर्यालले स्पष्ट पारे। बरबोटका चेपाङ समुदायका १० घर र दोर्दी गाउँपालिका ९ भीरकुनाका चार घर गरी जिल्लामा १४ घरधुरी चेपाङ छन्।
चेपाङ समुदायले अन्य समुदायको खेतीपाती गर्दै जीविका चलाउँदै आएको छ।
