हुम्लाको सिमकोट विमानस्थलको सुरक्षा पोष्टमा खटिएका ११ जना सुरक्षाकर्मीमा कोरोना संक्रमण पुष्टि भएको छ । दुई दिन अगाडि स्वाब संकलन गरी प्रादेशिक प्रयोगशाला सुर्खेतमा पीसीआर परीक्षण गर्न पठाएका मध्ये ११ जनामा कोरोना भाइरसको संक्रमण पुष्टि भएको हो ।
एन्टिजिन किटबाट कोरोना परिक्षण गर्दा बिमान स्थलमा कार्यरत एक महिला प्रहरीलाई कोरोना संक्रमण देखिएको थियो । त्यस संगै उनको सम्पर्कमा आएका ११ जना र उनको गरी १२ जनाको स्वाब संकलन गरेर सुर्खेत पठाएकोमा एघार जनामा कोरोना पुष्टि भएको हुम्ला अस्पतालकी सिनियर अनमी सरिता बोहराले जानकारी दिइन् ।
उनका अनुसार कोरोना संक्रमित सबै बिमान स्थलमा खटिएका प्रहरी रहेका छन् । उनीहरु सबै होम आइसोलेशनमा बसेको र सबैको स्वास्थ्य अवस्था भने सामान्य रहेको छ ।
योसँगै हुम्लामा कोरोना संक्रमितको कुल संख्या ७८ पुगेको छ ।
प्रतिक्रिया दिनुहोस्
