काठमाडौ- प्रेम कथानक फिल्म ‘माया बस्छ कि के हो’ को पोस्टर सार्वजनिक गरिएको छ । राजु अधिकारीको निर्देशनमा बनेको फिल्मको राजधानीमा मंगलबार आयोजित पत्रकार सम्मेलनमा शीर्ष गीत प्रदर्शन गरिएको हो ।
नव अभिनेता सोनाल तामाङ र नव अभिनेत्री कस्मता निरौला प्रमुख भूमिकामा रहेको फिल्मको पोस्टरमा उनीहरुकै प्रेमिल मुद्रा समेटिएको छ । शरद अधिकारीको प्रस्तुतिमा बहादुर सिंह तामाङ र गंगा गिरी निर्माता रहेको फिल्मको कथा आरती अधिकारीले लेखेकी हुन् ।
हल खुलेपछि प्रदर्शन मिति तय गरिने फिल्मको एसोसिएट डिरेक्टरमा आशुतोष अधिकारी र मुख्य सहायक निर्देशक दीपक अधिकारी हुन् । चलचित्र बिकास बोर्डका अध्यक्ष दयाराम दाहालको प्रमुख आथित्यतामा सम्पन्न कार्यक्रममा उनले सरकारले छिट्टै नै हल खुलाउने तयारी गरिरहेको जानकारी दिँदै फिल्म र टिमलाई शुभकामना व्यक्त गरे ।
कार्यक्रममा चलचित्र निर्देशक समाजका उपाध्यक्ष राजेन्द्र उप्रेती, महासचिव जनकदीप पराजुलीलगायतले पनि फिल्मलाई सफलताको शुभकामना ब्यक्त गरेका थिए । पत्रकार सम्मेलनमा प्रदर्शन गरिएको ‘माया बस्छ कि के हो…’ बोलको शीर्ष गीत शुक्रबार साइराम पिक्चर्सको युट्यवमार्फत सार्वजनिक हुने जानकारी दिइएको छ ।
अर्जुन पोखरेलको शब्द र संगीत रहेको सो गीतमा अन्जु पन्त र सुगम पोखरेलको स्वर छ । रामजी लामिछानेले कोरियोग्राफी गरेको गीतमा सोनाल र कस्मतालाई रोमान्टिक मुडमा प्रस्तुत गरिएको छ । गीत बेल्जियम, स्वीजरल्यान्ड र नेदरल्यान्डका विभिन्न स्थानमा रबिन्द्र बरालले खिचेका हुन ।
बिपिन मल्लले सम्पादन गरेको फिल्ममा सोनाल र कस्मताका साथमा उपेन्द्र थापा,नरेन्द्र थापा, बेनी ढुंगाना, सब्बु पौडेल, हरिकृष्ण कार्की र तेजेन्द्र कँडेलले अभिनय गरेका छन् । जनपुकार मिडिया हाउसको ब्यानरमा निर्मित फिल्मको वितरण आरआर फिल्मस्ले गर्नेछ ।
