काठमाडौं- नेपाल कम्युनिस्ट पार्टी (नेकपा) प्रचण्ड-नेपाल समूहले शुक्रबार गरिरहेको विरोध प्रदर्शनका लागि भाषण गर्न बिच सडकमा मञ्च बनाएको छ ।
मञ्च बनाएपछि टुँडिखेलको वरिपरिको सडक भएर जाने विभिन्न ठाउँका यात्रु र सवारी प्रभावित बनेका छन् । रत्नपार्कबाट भन्द्रकाली आउने सडकको प्रदर्शन मार्ग प्रवेश गर्ने र भन्द्रकाली जाने विन्दुमा मञ्च तयार गरिएको छ ।
यो सडक खण्ड रत्नपार्कबाट ललितपुर र भक्तपुर जाने सवारीका लागि प्रयोग हुन्छ । माइतीघर, बानेश्वरका लागि छुटिने सवारी पनि यही बाटो भएर जाने गर्छन् ।
महानगरीय ट्राफिक प्रहरी महाशाखाका अनुसार यतिबेला उपत्यकाका सबैजसो मुख्य सडकमा सवारी आगमन प्रभावित भएको छ ।
यसले गर्दा बिरामी बोकेर अस्पताल जाने एम्बुलेन्ससहितका आपतकालिन् सेवाहरू प्रभावित बनेका छन् । अनामनगर हुँदै वीर अस्पताल जान लागेको एम्बुलेन्स जाममा परेको छ ।
