काठमाडौं– प्रधानमन्त्री केपी शर्मा ओलीले नेकपा दाहाल–नेपाल समूहका अध्यक्षद्वय पुष्पकमल दाहाल प्रचण्ड र माधवकुमार नेपाललाई सिङ फुक्लिएको तिल्के गोरुजस्तै भएको टिप्पणी गरेका छन् । दाङमा नवनिर्मित पुलको सोमबार उद्घाटन गर्दै प्रधानमन्त्री ओलीले प्रचण्ड–माधवलाई तिल्के गोरुको शंज्ञा दिएका हुन् ।
‘एउटा तिल्के गोरु थियो । त्यो गोरुले अर्को गोरु देख्नै नहुने । झम्टी हानुपर्ने, सिंगौरी खेलिहाल्नुपर्ने । भुइँ खोस्रिने, हुक्का गर्ने । अनि, त्यसको फ्वाँफूँ देखेर अरु डराउने’, ओलीले भने, ‘एक दिन अलिक नटेर्ने खालको बहर गोरु परेछ । घड्याप्प जुधेको । बुढो तिल्के गोरुको सिङ भाँचिदियो । तिल्केलाई रिस त उठ्यो होला, सिङ भाँचिएकोमा । तर, जुध्न सकेन ।’
प्रचण्ड र माधवप्रति लक्षित गर्दै ओलीले भने, ‘यी तिल्केहरु पनि त्यस्तै हुन् । यिनले फाँफुँ गर्दै गर्छन्, फुक्लिएको सिङ लिएर हिड्दै गर्छन् ।’
ओलीले जनता सचेत भइसकेकाले धाकधक्कु नलगाउन, तिघ्रा नठटाउन र खुट्टा भ्याटभ्याट नगर्न प्रचण्ड–माधवलाई चेतावनी दिए । ‘अशान्ति मच्याउने यिनसँग क्षमता पनि छैन । दम पनि छैन । यिनीहरूले अब केही पनि गर्न सक्दैनन्’, उनले भने ।
प्रधानमन्त्री ओलीले अहिलेको संविधानअनुसार नै मैले प्रतिनिधिसभा विघटन गरेको दावी गरे । ‘केही मान्छेहरू निर्वाचन नहोस् भन्ने चाहन्छन् । किनकी उनीहरू जनतामा जान डराएका छन् । गए भने त जनताले धुलो चटाइदिन्छन् ।’
उनले निर्वाचन हारेकाहरूले रेष्टुरेन्ट र चौतारीमा बसेर आफूलाई कारबाहीको नाटक गरेको टिप्पणी गरे । ‘केही मान्छेहरू बैठकमा नआएर, चोकचौतारामा बसेर अध्यक्ष बनाएका थिए, निर्वाचन आयोगले अध्यक्षसध्यक्ष खतम पारिदियो ‘ उनले नेपालप्रति व्यंग्य गर्दै भने, ‘केपी ओलीलाई साधारण सदस्यबाटै निकालिदिए रे! तपाईंहरूलाई कुरा सुन्दा हाँस्न मन लागेन?’ प्रधानमन्त्री ओलीले भने ।
